Ran vulhtute hmasawn theihna tur kan ngaihtuah zel dawn - Vety Minister

Animal Husban­dry and Veteri­nary minister C Lalsawivunga chuan nimin khan Hnahthiala district veterinary officer pisa leh Thenzawla sial farm a tlawh a, khawtlang hruaitu leh department-a thawkte nen inkâwm­in, ZPM sorkar­na hnuaiah ran vulh­tute'n hma an sawn theihna tur an ngaihtuah zel dawn thu a sawi.

AH&Vety Minister chuan, ranvulh chu eizawnna ṭha leh ngêlnghet a nih thu sawiin, "Kan ṭhalaite pawhin mumal zawka ranvulh dan ngaihtuahin eizawnna tlak a ni tih hria se ka duh hle. ZPM sorkarna hnuaiah hian ran vulhtute'n hma an sawn theihna tur kan ngaihtuah zel dawn a ni," a ti.

AH&Vety department chu mipui nena inhne reng an nih thu sawiin Minister chuan, "Department pawimawh tak a nih avangin thawktute pawh kan inthlahdah a thiang lo. Sa thianghlim leh tuihnai hnianghnâr taka mipui hnena chhawp chhuah a pawimawh a, chu chuan kan hriselna thlengin a nghawng tlat a ni," a ti a; mipui mamawhnaah a hmunah kal chilha an harsatnate zir chianpui zel a ṭul thu a sawi.

C Lalsawivunga chuan, Mizote chu ranvulh uar hnam an nih thu leh an chemkalna tak nia a lan thu a sawi a, "Ranvulh kawngah ṭan kan lak a ngai a, ran chaw siam kawngah pawh state dang aṭanga lak luh ngai loa kan ram chhung ngei aṭanga ran chawa intodelh dan kan ngaihtuah a ṭul," a ti.