KHAWTHLIR

Thlalak thawh theih

Information & Public Relations department chuan Mizoram Calendar 2025 a siàm tura tarlan turin Mizoram hlimthla lanna thlalakte thawh turin mipui an sáwm. Thlalak thehluh tur chu khawih danglam (edit) loh, lian ṭha tak a nih a ngaih thu te, August 16, 2024 thleng IPR Directorate-ah leh diprmizoram@gmail.com ah thehluh/thawn theih a nih thu te, thlalak thehluttute'n thlalak hming (caption), thla latu hming leh nihna leh phone number tarlan tur a nih thu an tarlang.

DMR-in mipui ngen

Disaster Management & Rehabilitation department chuan thuchhuah siamin, July 2, Thawhlehni zana leiminin Bawngkawn-Durtlang kawng a hnawh pin chu lirthei kaltlang theiha tihtlang ni tawh mah se, leivûng then fai hna chak taka thawh a ngaih avangin a ṭul dan azirin kawngpui khâr ṭhin a ngai dawn thu an tarlang. Kawngpui khar chángin dawhthei taka hrethiam turin mipui an ngen a ni.

Ar notê sem

Mission Foundation Movement (MFM) bultumin nimin khan Lunglei Farm Veng community hall-ah chhungkaw harsate chhawmdawl nan ar notê sem a ni a, Social Welfare & Tribal Affairs, Women and Child Development minister Lalrinpuii'n a hmanpui. Lunglei district-a thingtlang khaw 13 leh Lunglei khawpuia veng palia chhungkaw 70 hnenah ar note 15 ṭheuh leh a chaw pek a ni.

Chhiatna tlawh

Minister PC Vanlalruata leh ZPM vice president C Lalnunnema te chuan nimin khan Zuangtui leh Muthia leimin vanga in leh lo chánte an tlawh a, ṭanpuina pawisa an pe. PC Vanlalruata chuan, khuarel chhiatna vanga in leh lo chân, thi leh hliam an awm chu sorkarin a tawrhpui thu leh a tih theih ang angin sorkarin a buaipui zel dawn thu a sawi.

Career counselling

MZP General Headquarters leh CT Group, Punjab chuan nimin khan MZP conference hall-ah Career Counselling & Felicitation Ceremony an buatsaih a, School Education director Lalsangliana'n a hmanpui. Pawl 12 zo tawh science subject late leh pawl 11 & 12 zir mek mi 70 an tel a ni.

Fimkhur turin chah

Khawzawl bawrhsap K Vanlalṭhiana chuan India Meteorological Department, Regional Meteorological Centre, Guwahati leh Meteorological Centre, Aizawl ten June 30, 2024-a hriattirna an chhuah zûlzuiin, tun hnaia ruahsur vanga chhiatna hrang hrang thleng thei lakah fimkhur turin mipui a chah. Chhiatna thleng a awm chuan District Emergency Operation Centre phone number 9233201092/9612521379-ah hriattir turin an ngen a ni.

DC-in hall hawng

Kolasib bawrhsap John LT Sanga chuan nimin khan Kolasib Diakkawna Brig. C Vankunga Shopping Centre-a UDPA department-in an conference hall an chei ṭhat a hawng.

Experential Learning Centre

Champhai district Experential Learning Centre (ELC) Management Committee chu nimin khan an chairman James Lalrinchhana, bawrhsap kaihhruaiin DC conference hall-ah an ṭhukhawm. ELC hi Ministry of Information & Broadcasting-in state ṭhenkhatah a din a, Mizoramah chuan Champhai district-ah din niin, August 7, 2023-ah hmalak ṭan a ni a, vawiinah hawn a ni ang.

Minister-in home a tlawh

Social Welfare & Tribal Affairs, Women and Child Development minister Lalrinpuii chuan nimin khan Lunglei Observation Home leh Pukpuia Special Home a tlawh a, thawktute'n an mamawh hrang hrang an lo thlen. Minister chuan, Mizoram mipui an tam loh thu sawiin, "Chuti chung chuan naupang humsual dai palh enkawl tur kan nei ve reng mai," a ti a; home-a thawkte chu theihtawp chhuaha an rawngbawlna hlen chhuak turin a fuih.