Dan thar pathum zirhona buatsaih

Sorkar laipuia Ministry of Information & Broadcasting leh Press Information Bureau (PIB) chuan nimin khan Aijal Club-ah chanchinbumite tan dan bawhchhiate hremna dan thar pathum zirhona, Media Workshop an buatsaih a, Assembly speaker Lalbiakzama'n a hmanpui.

Zirhonaah hian MJA member-te bakah, Mizoram Law College leh Indian Institute of Mass Communication (IIMC), Aizawla zirlaite an tel. Mizoram Law College-a associate professor P Lalremruati'n dan thar pathum - Bharatiya Nyaya Sanhita (BNS) 2023, Bahratiya Nagarik Suraksha Sanhita (BNSS) 2023 leh Bharatiya Sakshya Adhiniyam (BSA) 2023 awmzia leh kalphungte a sawifiah a; zawhna leh chhanna hun hman a ni.

Assembly Speaker chuan, dan hriat loh chu hremna pumpelhna atan a tling lo tih a sawi a, "Dan hi mi zawng zawng tana siam a ni a, thil sual tite hremna dan pathum, Indian Penal Code, 1860, Criminal Pro­ce­dure Code, 1973 leh Indian Evidence Act, 1872-te chu dan upa tawh, vawi tam tak siamṭhat tawh, British ze mila siam chu July 1, 2024 khan India ram mil­in thlak a ni ta," a ti.

Dan tharte chu kalphung mumal zawka Mizoramin a hman theih nan a kaihhnawih department, a bikin Law & Judicial department leh Home department-te chak taka inbuatsaiha hma la turin Speaker chuan a ngen a; thuthar thehdarhtu chu dan thar pathumte mipui náwlpui zirtir turin an pawimawh thu a sawi.

IGP (Law & Order) Lalbiakthanga Khiangte pawhin thu sawiin, "Dan tharte hi victim centric a nih dawn bakah mipui nawlpui, a bik takin hmeichhia leh naupangte a humhalh hle dawn a, victim compensation pawh a ngai pawimawh hle. Dan tharah hian 'Justice delayed is justice denied' tih piah lamah, kan justice system rei lutuk ṭhin chu a rang lamin a chingfel zung zung tura beisei a ni," a ti.

Thubuai ngaihtuah laite chu adjournment vawi hnih aia tam phal a ni tawh dawn lo tih sawiin IGP chuan, "Tunlai thiamna hmangin FIR leh thil dang pawh electronics communication hmangin thehluh theih a ni tawh dawn," a ti a; police aṭangin FIR copy a thlawna neih theih a nih dawn thu te, pawikhawihna, hnu chhui dan, hmalakna leh thlen chinte hriat theihna chanvo (right) a awm tawh dawn thute a sawi bawk.