Lungleia Council of Minister ṭhutkhawm district tan malsawmna thlentu a nih beisei

ZPM Ṭhalai leh Upa Committee chuan thuchhuah siamin, Mizoram chanchina a hmasa ber atana July 2, 2024-a Lungleia Council of Minister ṭhutkhawm neih a ni chu lawmawm an tih thu leh Lunglei district tana malsawmna thlentu a nih ngei an beisei thu an tarlang.

ZPM Ṭhalai chuan, "Lungleia Council of Minister ṭhutkhawm hian sorkar hmasa lama hmasawnnain a kal kân ṭhin Lunglei khawpui mai bâkah, chhim bial mipui hmasawnna tur sorkarin a vei tak zet a ni tih a tarlang chiang hleah kan ngai," an ti a; ZPM sorkarah chhim bial mipui tana minister-te a hmun ngeia an kal chu thlamuanthlak an tih thu an sawi.

July 2-a Council of Minister ṭhutkhawma rorelte chu thlamuanthlak an tih thu sawiin ZPM Ṭhalai chuan, AMC leh LMC corporator/councillor-te lawmman tihsan hi tih âwm takah kan ngai," an ti.

ZPM Upa Committee chuan, "ZPM sorkar, chief minister Pu Lalduhoma kaihhruai hian rualkhai zawka mipui tan rorelna hmun hi a ṭulna leh pawimawhna hmun apiangah an siam thei a ni tih lantirna turin Lungleiah rorelna sang ber an hûng hi lawmawm kan ti. Lungleia Cabinet meeting pawimawh tak Mizoram sorkarin a siam hi Lunglei district tan malsawmna thlentu a nih ngei kan beisei tlat a ni," an ti. Minister-te'n an department chan ṭheuhah Lungleia hmunhmate an hmu a, Lunglei district-a hmasawnna tura ruahmanna leh hmalak-nate sawihona hun an hmangte chu hlu an tih thu an tarlang bawk.