Minister-te'n football academy an tlawh

Minister of state pahnih B Lalchhanzova leh Lalnghinglova Hmar te chuan July 2, Thawhlehni tlai khan Lunglei Serkawna Sports & Youth Services Football Academy an tlawh a, Lunglei North bialtu MLA V Malsawmtluanga leh SYS offical-te'n an ṭawiawm.

Sports Minister chuan, SYS Football Academy chu India ram hmun danga football academy-te aia a hniam bikna a awm loh thu a sawi a, "Tumruhna leh thawhrimna nena in beih chuan hlawhtlinnain a hmuak ang che u. Thawhrimna zawng zawngah malsawmna a awm tih hre reng u la, in hmaa kal Mizo footballer hlawhtlingte hi tumruhna leh taimakna nen zin kawng zawh a, harsatna inbawhbehtir duh lohtute an ni," a ti.

SYS-in academy a neihte chu tihchangtlung zel an tum thu sawiin Lalnghinglova chuan, "Centralised Registration System hnuaiah academy-te mumal taka kalpui turin ruahmanna siam mek a ni," a ti a; SYS academy-te tihchangtlun dan tur dapin sorkar laipui dawr tura kal a tum thu a sawi.

B Lalchhanzova pawhin academy naupangte chu inpumpekna pumhlûm leh thawhrimna nen bei turin a chah a, "Tun aṭanga kum thum hnuah chuan a rah hmuh tur a awm tawh ka beisei, chutiang tur chuan duhsakna ka hlan che u a ni," a ti.

Serkawna Sports & Youth Services Football Academy-ah hian naupang 28 an awm mek a; minister-te'n an tlawhnaah hian Lunglei district High Powered Committee vice chairman V Malsawmtluanga, MLA pawhin thu a sawi a ni.