Mizoramah naupang 11 lung pawp hnawh a ni

Rashtriya Bal Swasthya Karyakram (RBSK) leh Ebenezer Medical Centre, Aizawl hmalaknain tun hnai khan Ebenezer Medical centre-ah naupang 11 chu an lung (heart) pawp hnawhsak an ni a; Mizorama lung pawp hnawh vawi khatna a ni.

National Health Mission (NHM) hotute hnen aṭanga thu dawn danin, Ebenezer Medical Centre-ah hian cardiologist Dr Vanlalmalsawmdawngliana leh amah puitute'n Congenital Heart Disease Device Closure Camp an nei a; Rainbow Hospital, Hyderabad-a cardioligist Dr Nageshwar Rao-a'n a rawn vil bawk. Naupang lung pawp hnawh ngai mi 11-te lung pawp hlawhtling taka hnawh a ni a, damdawi-in aṭangin chhuahtir vek an ni tawh.

Naupang 11-te lung pawp hnawhna leh a kaihhnawih sensote chu RBSK, Mizoramin an tum a; mi 11-te chhiar telin RBSK, Mizoram chuan naupang lung ṭha lo inenkawl ngai mi 101-te enkawlna senso a tumsak tawh a ni.

RBSK, Mizoram chuan, naupang, lung lama harsatna nei, inen­kawlna mamawhte tan Aizawl West DEIC, Kulikawn leh Lunglei DEIC, Lunglei District Hospital-ahte inhriattir theih a nih thu an tarlang a; anganwadi centre leh sorkar sikulahte naupang hriselna endik tura kal ṭhin RBSK Mobile Health Team hnenah inchhinchhiahtir theih a nih thu an tarlang bawk.