Kum 2024 chhungin Mizoramah ASF kaihhnawihah vawk 12,890 thi tawh

Vawk pùl hri, African Swine Fever (ASF) vangin kumin 2024-ah nimin thleng khan khua/veng 149-ah vawk thi/suat 12,890 a awm tawh a; nimin bikah khua/veng 40-ah vawk thi/suat 587 a awm.

AH&Vety department chhinchhiah danin, kuminah January 1 aṭanga nimin thleng khan Mizorama khua/veng 149-ah ASF vangin vawk 4,406 a thi tawh a, hri leng darh zel tur ven nan vawk 8,484 suat a ni tawh. Kumina ASF vanga vawk thi leh suat zawng zawng belh khawm chu 12,890 a a ni.

Nimin July 3 bikah Aizawl, Lunglei, Champhai, Kolasib, Serchhip, Saitual leh Khawzawl district-a khua/veng 10-ah ASF vangin vawk 261 a thi a; Aizawl district-a Melriatah vawk thi tam berin, 141 a thi.

Aizawl, Lunglei, Kolasib leh Serchhip district-a khua/veng 21-ah nimin khan hri léng vangin vawk 326 suat a ni a, Aizawl district-a Sairang Dintharah vawk 95 suat niin, suat tamna ber a ni.

Nimina ASF vanga khua/veng 40-a vawk thi leh suat zawng zawng belh khawm chu 587 a ni a; district anga chhûtin nimin khan Aizawl disrtict-ah vawk thi 145 leh suat 173 awmin a tam ber. Nimin bika Aizawl district-a vawk thi leh suat zawng zawng 318 chu vawk thi/suat zawng zawng 587 aṭangin 54.17% a tling.