Vawk lâk luh khap theih thu sawi
Animal Husbandry & Veterinary department hotute chuan, Mizoram sorkarin ṭul a tih chuan state páwn aṭanga vawk leh vawksa lak luh a khap theih thu an sawi.
Star Farm neitu Malsawmi chuan July 2, 2024-a Aizawl Press Club-a thuthar thehdarhtute a kawmnaah, state dang aṭanga Mizorama vawk/vawksa lak luh chu state sorkar thuneihna a nih loh thu te, India sorkar aṭanga phalna lâk tur a nih angin phalna a neih thute a sawi a ni.
Malsawmi thusawi chungchangah hian zawhna chhângin AH & Vety hotute chuan, Star Farm neitu thil sawi chu a dik tâwk loh thu leh state sorkarin ṭul a tih chuan state pawn aṭanga vawk leh vawksa lak luh a khap theih thu te, state sorkarin a lo khap tawh ṭhin thute an sawi a ni.
Mizoram State Disaster Management Authority-a State Executive Committee chairman Dr Renu Sharma, chief secretary chuan May 24, 2024 khan Disaster Management Act, 2005 Section 24(1) tlawhchhanin African Swine Fever léng avangin Mizoram páwn aṭanga vawk leh vawksa lak luh khapna thupek a chhuah a, "Thu leh awm hma zawng vawk, a sa leh vawksa aṭanga siam thil eng pawh ram chhunga state dang leh ram dang reng reng aṭang pawha lak luh khap tlat a ni," tia tarlan a ni.