Mizoram MLA inthanpui November 7, 2023-a neih turah political party pathum - INC, MNF leh ZPM-te'n seat awm zawng zawng 40 an chuh dawn a; heng party pathumte hian candidate 120 neiin, an kum chawhrual chu 54.03 a ni.
Seat 40 chuh tur political party pathum zingah MNF party candidate-te kum chawhrual chu 56.37 niin an upa tlâng ber. Congress party candidate-te kum chawhrual chu 53.6 a ni a, ZPM party candidate-te kum chawhrual chu 52.12 niin an naupang tlâng ber a ni.
MNF party candidate zinga upa ber chu Tawnluia (80) a ni a, a nuapang ber chu Lalremruata Chhangte (35) a ni. Congress party candidate naupang ber Lalhmachhuana chu kum 39 niin, a upa ber chu Lalsawta (77) a ni a; ZPM party candidate zingah Baryl Vanneihsangi (32) leh Jeje Lalpekhlua (32) te an naupang ber a, Lalduhoma (73) a upa ber a ni.
Party pathum candidate mi 120-te hi kum 32-80 inkar an ni a; kum 61-70 inkar candidate mi 10 ṭheuh an nei a ni. Kum 31-40 inkar candidate ngah ber ZPM-in pathum an nei a, kum 41-50 inkarah INC-in candidate ngah berin 16 an nei.
Kum 51-60 inkarah MNF-in candidate 15 neiin an ngah ber a, kum 71-80 inkar candidate pawh MNF hian ngah berin, pathum an nei a ni.
BJP leh AAP-te'n candidate 27 an nei dawn a; BJP candidate mi 23-te kum chawhrual chu 51.82 niin, AAP candidate mi palite kum chawhrual chu 38.75 a ni.
BJP candidate zinga naupang ber F Vanhmingthanga chu kum 31 a ni a, a upa ber chu kum 71 mi JB Rualchhinga a ni. AAP candidate naupang ber leh upa berte chu Joseph Biakthianghlima (35) leh Andrew Lalremkima Pachuau (42)-te an ni.
Kumin inthlanpuiah hian independent-a ding tur candidate 23 an awm a, heng zinga 17 chu Lalpa Chhiahhlawh Intelkhawmte tih hminga independent-a ding an ni. Midang paruk erawh pawl behchhan nei loa ding an ni thung.
Lalpa Chhiahhlawh Intelkhawmte thlawpa independent candidate mi 17-te kum chawhrual chu 52.82 a ni a; behchhan nei loa ding mi parukte kum chawhrual chu 49.33 a ni bawk.
Independent candidate zawng zawng mi 23-te kum chawhrual chu 51.91 a ni a; an zingah K Lalrimawia (74) chu upa berin, Lalruatfeli Hlawndo (31) chu a naupang ber a ni a, an pahnih hian Lalpa Chhiahhlawh Intelkhawmte thlawpa ding ve ve an ni.
