Inthlan lo awm tura kan innghahna chu Pathian a ni - MPCC President
Congress Ṭhalai chuan October 28, Inrinni zing khan Aizawl West-III huam chhung Maubawk Dawrkawnah vantlang inkhawm an buatsaiha, thusawitu MPCC president Lalsawta chuan inthlan lo awm tura an innghahna chu Pathian a nih thu a sawi.
MPCC President chuan India ram chu kehchhe vek thei dinhmunah a ding tih sawiin, "A din chhan chu BJP-in Hindu lalram din an tum vang a ni. RSS leh Bajrang Dal-te chu an hmanraw leklam ber a ni. Missionary-te’n Pathian ram chanchin ṭha a langin an fehchhuahpui ngam loa, Bible track pawh an sem thei tawh lo, Ram pawn atanga ṭanpuina pawh an dawng thei tawh lo. Nasa takin kohhranin harsatna kan tâwk," a ti.
Lalsawta sawi danin, MNF-in inneihna hi man inpek hian a tâwk mai e, tiin ruahmanna an siam. Hei hi kohhran dan thianghlim pawisak lohna a ni. Hei hi BJP an mawngzawm nghehzia leh UCC an duhzia lantirtu a ni.
Report an dawn reng rengah Pathian leh mipuite zarah an sorkar ngei dawn tih a chian thu sawiin MPCC President chuan, "Kan auhla tur pawh Pathianin min pe. Kristiante dinhmun nekcheptu BJP hmanhmawh taka paihthlak a ngai. Kohhranin kan rinna vawnhim a ṭulzia min zirtir. Hei hi a taka kan hlenchhuah ngei hi Kohhran mipui te’n kan bat a ni. Enchhin tih vel mai maia inkhualtelem hun a ni tawh lo," a ti.
Lalsawta sawi dangte
■ Ṭhalai hnathawh tur nei lote tan hna nuai khat kan siam dawn a, ṭhalai tam takin an theihna leh thiamna hmangin hlim takin ei an zawng ang.
■ Congress-in Pathian leh mipuite zara sorkarna a chan chuan cancer leh natna harsa zual bik vei, inenkawlna la mekte ṭanpui nan kum tin budget-ah cheng vbc. 5 kan dah dawn.
■ Kan ram leh hnam rohlu kum upa ten tar chawmna thla tin Rs. 300 leh Rs. 800 an dawn ṭhin chu Congress Party chuan thla tin Rs. 2,000 pek a ni ang
■ Rualbanlo leh hmeithaite tan National Social Assistance Programme hnuaia thla tin Rs. 400 an dawn chu Rs. 2,000 in pek an ni bawk ang.
■ AAY leh PHH card nei te, chhungkaw lu ber hmeichhiate hnenah gas subsidy Rs. 750 pek an ni bawk ang.