Mizoramah Congress party in thlan tlin chuan hmasawnna a thleng ang - Karnataka Minister

Karnataka Energy minister KJ Jorge chuan October 28, Inrinni khan Aijal Club-ah thuthar thehdarhtute kawmin, Karanataka-ah Congress sorkarin inthlan dawna an thutiamte an ti hlawhtling mek niin a sawi a, "Mizoramah pawh Congress a sorkar chuan thutiamte ti hlawhtlingin, hmasawnna a thleng ang," a ti.

KJ Jorge chuan India ram a inthlak mek tih sawiin, "A inthlak chhan chu pawisa tih thih te, thil man to te, buaina chhuakte vang a ni. Manipur buainate hi sawi fiah rual lohin a rapthlak a, Prime Minister hian tlawh pawh a la tlawh lo a, remna leh muanna a awm theih nan thâ a la thawh lo a ni," a ti a, India ramah sakhua leh hnam tenau zawkte an him lo mek niin a sawi.

Mizoram ṭhalaite hian eizawnna mumal an mamawh tih sawiin Karnataka Minister chuan, "Dinhmun ṭhaa din an duh ve a ni tih kan hria. MNF leh ZPM-te hian central sorkar thawhpui theih an neih a ngai a, chu chu BJP a ni. BJP chêt dan kan hria a, anmahni hmachhawn theitu awmchhun chu Congress party chauh an ni," a ti.

Karnataka Minister chuan mipuite hian BJP hi an thutiam avangin an ring a, rorelna an pe tih sawiin, "Kum kua an lo sorkar hnu hian an thutiamte chu an tihlawh­tling thei ta loa, hmasawnna a awm loa, ṭhalaite'n hna an hmu thei loa, an hnate an chán zawk a ni," a ti a, mipui nawlpuiin an tawrh nasat thu a sawi.

Rahul Gandhi inpumkhatna kawng zawh avangin Karnataka-ah Congress a sorkar phah tih sawiin KJ Jorge chuan, "Karnataka-ah chuan Congress chuan kan thutiamte kan ti hlawhtling mek a ni. Keipawh Energy minister ka ni a, mipuite hnenah power unit 200 chin kan ngaidam a, a bak an hman chuàn chauhin an hman man an chawi," a ti.

Karnataka Minister sawi danin, an sorkar chuan ṭhalai hna hmu lo graduate-te Rs 3,000 an pe a, diploma neite Rs 1,500 an pe ṭhin bawk. Buh thar hlawk theihna atan hma nasa takin an la.

KJ Jorge chuan Manmohan Singh kaihhruai sorkarin nasa takin hmasawnna a thlen nia sawiin, "Rahul Gandhi kaihhruai pawhin hmasawnna a thlen dawn. Mizoramah pawh Congress in thlan tlin chuan hmasawnna a thleng ang," a ti a, Mizo mipuite chu Mizoram hmasawnna atan Congress vote turin a sawm.