BJP-in hmelma enin min en a ni ber - MNF Party

MNF chuan thuchhuah siamin, tun hnaiah India ram BJP hruaitute Mizoramah lokalin, MNF chu hmelma enin an rawn en a ni bera a lan thu an tarlang.

MNF chuan central lama BJP hruaitute'n MLA inthlan lo awm turah campaign rusum an rawn thlak nasa hle tih tarlangin, "Mizorama sorkarna chang mektu MNF party chu vawiduai lo rawn sawichhiain, hmelma enin min rawn en a ni ber," an ti.

BJP hruaitute'n MNF chu 'Pathian leh kan ram tan' titlattu sakhaw tih bik nei an nihzia an rawn hrechiang tih tarlangin MNF chuan, "Kan ram leh kan hnam kaihhruai hna kan thawhna kawngah hnawk min ti hleah kan ngai," an ti a, India secular state hnuaiah Mizo sakhaw hum­him tura hnam party an nihna anga an chetzia an hmuchiang hleah an ngaih thu an tarlang.

MNF chuan sakhaw zalenna hnuaiah rinna dang kalpuitute Mizoramah nekchep chuang loin, zalen taka an khawsak hona karah ram neitu rilru nen MNF-in sorkarna an kalpui tih tarlangin, "Hindu sakhua leh rinna tundin tum tlat BJP party tan chuan a hnawk em em reng a ni," an ti.

Sum leh hmasawnna chauh hi dam chhan a ni lo nia tarlangin MNF chuan, "Kan hnam leh kan sakhua a him hmasak phawt hi MNF chuan ṭul a tiin, chumi kawngah chuan chak takin hma a la ṭhin," an ti a, hmalak chhunzawm zel pawh a thil tum lian berte zing a mi a nih thu an tarlang.

Mi tamtakin MNF leh BJP chu thawk dun leh inmawngzawm ang hialin sawi ṭhin mah se, BJP hotute chetzia leh khawsak phungin an thawhho lohzia leh an inzawm lohzia a pholang chiang hleah an ngai tih tarlangin MNF chuan, "Thawhpui an tum leh biakrâwn an neih mek chu rawn bei ve hauh lo leh an tan bengchheng hauh loin ZPM tan kawng an hawn sak mekah kan ngai a ni," an ti.