MNF-in thu thudik lo hmangin Duhoma an bei nasa hle - ZPM

ZPM chuan thuchhuah siamin, MNF-in tunhnaiah an leader Lalduhoma thudik lo leh belhchian dawl lo hmangin an beisei nasa hle tih an tarlang.

ZPM chuan, ZPM Leader chu an bei duh a nih pawhin rinthu leh thudik lo ni loin, thudik leh belhchiandawl ni thei se an duh tih tarlangin, "Kristian rama hetiang politics ṭawp leh bawlhhlawh tak chhawm nuna a awm zel tur hi chuan kan phal lo a ni," a ti.

Politics tuinu, hmana an lo hlawhtlinpui tawh ṭhin ang tharthawh leh tumah MNF puhin, "Khawvel a ṭhang zel a, tunah chuan mi an fing tawh a, engkim awlsam taka haichhuah zung zung a theih tawh," an ti a, kum 2023 a ni tawh tih hre reng turin MNF an chah.

ZPM tarlan danin, Lalduhoma dawt leh thudik lo pawh pawisa loa an bei chiam chu kum 2018-a an intiamnaah tihhlawhtlin mumal sawi tur an neih loh vang leh kumin 2023 inthlan lo awm turah policy leh manifesto sawi tur an neih tak loh vang a ni. Mizoram mipuiten sorkar mai tura an ngaih ZPM leh ZPM leader Lalduhoma sawichhiat chu MNF policy pui ber a ni.

ZPM chuan ram tana an hmachhawp te, ram tana a tihtum te pawh sawi ngam tawh lo khawpa kum 5 chhung ram an lo kaihhruai rah MNF-in an têl mek nia tarlangin, "An chhuanlam ber Covid lah chhuanlam tling a nih lohzia mipuiin an hrethiam tawh," an ti.

Cheng vbc. 3,000 dâwn Covid avanga sum hmuh tur hmu kim lo anga an MNF-in an sawi ṭhin chu fiah taka hailan a nih thu tarlangin ZPM chuan, "Covid chhuanlama kan sum hmuh loh an sawi ziah vbc. 2,636.52 leh kan dawn belh zat vbc. 2,563.17 inthlauhna hi vbc. 73.35 chauh a lo ni," an ti a; vbc. 2,563.17 ah hian bungrua leh hmanrua ang zawnga dawn leh Mizoram mipui, tlawmngai pawl hrang hrang leh kohhrante thawhkhawm a la tel loh thu an tarlang bawk.