Inthlan atana inbuatsaihte hrilhfiah

Election Commission of India (ECI)-in kar tin neih tura a ruahman angin October 28, Inrinni khan Siaha district election officer Lalhmunsanga Hnamte chuan DC mini conference room-ah thuthar thehdarhtute a kawm a, inthlanpui atana sorkar inruahman dan leh hmalaknate a hrilhfiah.

Lalhmunsanga Hnamte chuan, inthlan campaign neih mek zel a nih avangin model code of conduct (MCC) bawhchhiatna a awm leh awm loh uluk taka vil reng a nih thu a sawi a, "Star campaigner-te Siaha district-ah campaign neiin an lo kal fo a, Pu Rajnath Singh, Pu Amit Shah leh Pi Priyanka Gandhi Vadra-te pawh an lo kal dawn. Star campaigner-te hi uluk taka lo vil a ṭul hle a, a ṭul chuan officer-te pawh star campaigner-te hun hmannaah hian tirh an ni ang," a ti.

Postal ballot hmangin polling official-te'n vote an thlak tawh tih sawiin DEO chuan, "Saiha assembly constituency-ah vote 242 leh Palak assembly constituency-ah vote 133 tlain, a vaiin vote 375 a tla," a ti a, October 30, 2023 hian driver-te leh October 31, 2023 hian police-te'n postal ballot hmangin vote an thlak ve dawn thu a sawi.

Lalhmunsanga chuan, kum 80 chunglam leh rualbanlo (Person with Disabilities)-te tan mahni in lama vote thlak (home voting) kalpui a nih thu a sawi a, "Home voting ti tur mi 157-in BLO-te hnenah hming an thehlut a, October 30, 2023 hian vote an thlak ang," a ti a; dan leh thupek kengkawh turin BSF Company pahnih an awm mek thu leh company pakhat dang an lo thlen belh leh dawn thu a sawi.

Siaha district-ah polling station tinah awm ngei ngei tura tih (assured minimum facilities) - tui, electric, toilet, ramp leh a dangte dah vek turin hmalak mek a nih thu te, tun dinhmunah lirthei luh theih lohna polling station a awm loh thu leh critical polling station a awm loh thute a sawi bawk.