Zirchianna hmanga policy nei awm chhun kan ni - ZPM Research Wing

ZPM Research Wing chuan October 28, Inrinni khan Aiawl Press Club-ah thuthar thehdarhtute kawmin, zirchianna hmang (research base)-a policy nei awm chhun an nih thu an sawi.

ZPM Research Wing secretary Dr KC Lalmalsawmzauva chuan, an wing chu university leh college-a zirtirtute, sumdawngte, entrepreneur leh sorkar hnathawk pension-te an nih thu sawiin, "Kawng hrang hranga ram tana rualawt em em ṭhin, sorkar kalphungin a zir loh avanga tihlawhtling thei lo, ZPM-a beiseina nei kal khawmte kan ni ber. Langsar takin politics khel thiam ve lo mah ila ram kan vei ve em em a ni," a ti.

An din chhan sawiin Dr KC Lalmalsawmzauva chuan, "Research base hmanga Zoram mipui kaihhruai leh hmasawnna thlen a ni. State kan nih hnuah kum 36 chhung zet chu party pahnihten rinthuin Mizoram an kaihruai tawh a, manifesto-te pawh vote zawn nan an inziah ṭhat siak mai mai a ni," a ti a, rinthua Mizoram kaihhruai a nih avangin state dangte'n an tlanpel duai duai niin a sawi.

Dr KC Lalmalsawmzauva chuan rinthu ngawt ni lo, zirchianna hmanga Zoram mipuite kaihhruai an nih theih nan tih theih an neihve beiseiin ZPM an thlawp thu sawiin, "ZPM policy buatsaihnaah a theih chin chin research based-a kalpui a nih theih nan thâ kan thawh ve a ni. Kan thiamnate tlem hle mah se, party dang policy leh manifesto-te ai chuan belhchian dawl zawk turah kan ngai," a ti.

An party policy-ah ṭhenkhat chu tih­hlawhtlin nghal mai theih a awm rualin, ṭhenkhat chu hun duh rei tur chi a nih thu sawiin Dr KC Lalmalsawmzauva chuan, "A ṭhen chu sorkar hnua enzui ngai zelte pawh a awm awm e. Policy leh manifesto inziahṭhat siak ngawt loin, research based policy hi party tin ten neih ni thin se kan duh," a ti a, ZPM chu research base policy nei awm chhun an nih thu a sawi.

Zawhna chhangin ZPM Research Wing member-te chuan party dang aṭangin sawmna an dawn ngai loh thu sawiin, "ZPM hi min sawmtu awm chhun an nih avangin kan zawm a ni," an ti.

ZPM Research Wing sawi dangte

▶ Zirna dik tak leh ṭha taka kan kalpui chuan kan rama kan induhkhawp lohna zawng zawng hi kan siamṭha thei ang. Zirna a dik chuan thil dang pawh a kal dik ang.

▶ Mizo ṭawnga zir kan uar dawn. Kan ṭawng an thiam hmasak a ngai, chumi hnuah sap ṭawng an zir ang. Sap ṭawng kan hlamchhiah dawn lo. Kum 5 chhungin danglamna kan thlen ang.

▶ Sorkarin social security a ngaihsak tawk lo. Tar pension, rualbanlo pension, etc. Central aṭanga rawn kal hi kan state chuan a pe chhuak hleithei lo. Tar pension hi Rs 1,000-ah tihsan kan tum.

▶ Jail a tawt deuh vek a, home hrang hrangah an tawt. Mihring cheng zat ngaihtuahin a tam lutuk. Kan social life nghawng a ni a, kan inenfiah a ngai hle. Chhungkaw ngelnghet leh ṭha din a nih theih nan nasa takin ṭan kan la dawn.

▶ Kut hnathawktute thlai thar natna tidam tur chuan a market kan hriat a ngai. A kal dan tur ruahmanna road map kan duang.

▶ Market policy munal tak an kalpui duh loh vangin kan thlai tharte an hralh thei lo mai a ni. Kan sorkar hunah kan hralh chhuak ngei dawn.

▶ Ran chawa intodelh kan tum. Ran chaw chìn tur item kan thlang tawh.

▶ Kan rama mau awm sa hmangin agarbati stick siam chhuah theih, hma kan la dawn.

▶ Phai ram milin kawng siam a ni a, kan kawng a tlo lo. Kan lungte hi chang tâwk lo mah se, tlo zawka hman a nih theih dan tur kan zirchiang tawh.