Hnam dang dan loa khawsa dap chhuak

Mizo Zirlai Pawl (MZP) chuan October 28, Inrinni khan Aizawl khawpui hmun hrang hrangah hnam dang dan loa khawsa dap­chhuah hna­tlang an nei a; inner line permit (ILP) nei lo mi 78 leh kumtlinglo hna­thawka chhawr eng emaw zat hmuhchhuah niin, thuneitute kutah an hlan.

MZP chuan, sorkar leh thuneitute'n theihtawp chhuaha hma an lak mek laia tûk khat hnatlana hnam dang permit nei lo leh dan loa sumdawng ṭhahnem tak man chhuah tur an awm chu pawi a tih thu a sawi a, "Heng hnamdang dan loa khawsate hi permit nei lo bakah, permit dam hun chhung zo tawhte an ni hlawm. India danpui-in a bik taka min humhalhna dan ILP hi a nihna ang taka hmang tur leh a pekchhuah dan chungchangah pawh fimkhur leh zuala kalpui turin thuneitute kan ngen nawn leh a ni," an ti.

Mizorama Local Council leh Village Council hruaitute chu ILP pekchhuah chung­changah document felfai lo chu hriatpuina lehkha pechhuak tawh lo turin MZP chuan a ngen a, "Hnamdang dan loa khawsa a hmuhchhuahte chinchang chu ngun takin a enzui dawn a, thawnkir an nih dan pawh a enzui dawn a ni, " an ti a; Mizorama dan loa hnam dang sumdawngte dapchhuaka a ṭul anga hma a lak zel dawn thu leh mipuite thlawpna an mamawh thu an tarlang.