Assembly Secretariat-in thawktu tur tun hnaia hna an lakte sût (cancel) tura sorkar karin nimin khan Assembly House kawtah MZP, MSU, hnampual zirlai pawl leh college students' union huaihawtin zirlaite an pung khawm. Hna lak tawhte sût a nih hma chuan hmalak chhunzawm zel an tum a, vawiinah pawh an pungkhawm dawn.

MZP president Lalnunmawia Pautu chuan, thawktu lak chungchanga Assembly Secretariat insawifiahnaah, autonomous an nih thu an tarlan chu an hai lo tih a sawi a, "MPSC pawh autonomous tho a ni a, dik leh fel takin hna an la mai. Assem­bly Secretariat-ah dikna leh zirlai mithiamte tana fair taka thawktu an la thei lo bik hi an inenfiah a ngai," a ti.

Chanchinbu pahnihah chauh advertise­ment chhuah a ni leh dilna hun tàwp dawnah post zat an tihbelhte chu tum nei saa hmalakna nia an ngaih thu sawiin MZP President chuan, "Zirlaite leh hna zawng mekte rilru an tina tak zet a, rang taka an cancel lo a nih chuan a tàwp thlengin kan dodal dawn. Exam question chungchangah hriatpui turin pawl pakhat an sáwm a, a dik dawn lo a ni tih hriain chu páwl chuan an sàwmna chu an hnâwl a ni, " a ti a; zirlai pawlte'n hma an lakna avangin vauna an tawh thu te, hna lakna chu ṭhiah a nih loh chuan Assembly Secretariat chu zirlaite'n an luh chhuah dawn thute a sawi.

MSU president Samuel Zoramthanpuia chuan, an punkhawm chhan chu lung­chhiatthlak a tih thu sawiin, "State dang Assembly Secretariat-te hian an lo hria ang a, an ṭhalaite hian min nuihzat ang tih a hlauhawm. Zirlaite'n kan phût - hna lak cancel hi a hlawhtlin hma chuan thâ thlah loin a tàwp thlengin dikna leh felna ṭan turin ka sáwm che u a ni," a ti a; zirlaite hmalakna chu thláwp turin mipui a ngen.

Zirlaite hian Assembly Secretariat-in thawktu a lak dan chungchang duh lohna ziak hrang hrang an keng a; an au rual bakah, resolution pathum an pawm bawk.