MLA Dr BD Chakma-a'n Politics a chawlhsan dawn

Tuichawng bialtu MLA Dr Buddha Dhan Chakma, Chakma Autonomous District Council (CADC)-a BJP president ni bawk chuan active politics a chawlhsan tawh dawn thu nimin khan Chawng-tea BJP pisaah a puang.

Vanglaini palai zawhna chhangin Dr BD Chakma chuan, kum 2014 khan Mizoram minister of state a nih laiin kum 50 a tlin chuan politics a chawlhsan tur thu a puan tawh thu a sawi a, "June 2023 khan kum 50 ka tling ta a, chuvangin, ka sawi lâwk tawh angin politics ka chawlhsan tawh dawn. Eng inthlan mah ka chuh tawh dawn lo," a ti.

Dr BD Chakma chuan, CADC BJP President nihna pawh a aiawh tura ruat hnenah August 2023 chhungin a hlan tur thu sawiin, "Doctor hna hun tam zawka thawh ka duh tawh bakah, zirna lamah hma kan sawn a, quality education kan neih theihna atan theihtawp ka chhuah dawn," a ti a; ṭhangthar zawkte tan politics-ah hmun a ken thu a sawi.

Dr BD Chakma sûlhnu

▶ Kum 2008-ah Congress ticket-in CADC MDC atan thlan a ni a, executive member a ni.

▶ Kum 2013-ah MDC atan Congress ticket vêkin thlan tlin leh a ni a, chief executive member a ni.

▶ Kum 2013-ah vêk Congress ticket-in Tuichawng bialah MLA atan thlan tlin a ni.

▶ Mizoram sorkarah hun eng emaw chen minister of state a ni a, a hnuah MLA pangngaiin a awm.

▶ Kum 2018-ah Tuichawng bialah BJP ticket-in MLA atan thlan tlin leh a ni.