LESDE Directorate building thar hawng

Labour, Employment, Skill Development & Entrepreneurship (LESDE) minister Lalchhandama Ralte chuan nimin khan New Capital Complex-ah LESDE Directorate building thar leh Mizoram Building & Other Construction Workers’ Welfare Board (MBOCWWB) hnuaia Multipurpose Centre thar a hawng.

Lalchhandama Ralte chuan, LESDE department chu hma an lak dan aṭangin ṭhalaite department tih theih a nih thu sawiin, "Labour & Employment department a nih laia mi ṭhenkhatin department ral mek leh hnathawh tur nei tlem tia an sawi ṭhin chu tun hnaia department huang zauh a nih hnu leh sorkarin mawhphurhna a pek belh hmangin kutkawih eizawnna dâwm kângtu leh kut hnathawktute hmakhua ngaihtuahtu a ni," a ti.

Pisa hawnna inkhawm hi LESDE secretary Lalramsanga Sailo-in a kaihruai a; Minister-in ṭhalai hna zawngte tana siam Employment Exchange (EMPEX) mobile application a tlangzarh bakah, MLA pahnih - Lalrintluanga Sailo leh Zothantluanga te pawhin thu an sawi.

Sorkar thuchhuah tarlan danin, Director General (Labour Welfare) Ministry of Labour & Employment-in 'Model Welfare Scheme for Building & Other Construction Workers' a siam a, chumi hnuaiah hian infrastructure siam phalna a dah. March 19, 2020-a MBOCWWB meeting vawi 27-na chuan scheme hnuaiah cheng nuai 1,500 hmangin Multipurpose Centre sak an rel a ni.

LEDSE Directorate leh Multipurpose Centre hi building thuhmun a ni a, Mizo chhiara chhâwng kua a ni. Cheng nuai 1,500 sénga sak a ni a, a satu contractor chu CB Engineering an ni. A sakna atan hian kum tin labour cess tling khawm aṭanga 20% chu MBOCWWB Budget-ah kum 2021-22 aṭangin dah a ni a, kum thum chunga sak zawh tura tih a nih laiin, kum hnih leh a chanveah sak zawh a ni.