KHAWTHLIR

Thisen pe

National Institute of Technology, Mizoram chuan nimin khan NIT Healthcare Centre-ah thisen pek an huaihawt a, Civil Hospital, Aizawl tan thisen unit 35 an pe a, petute mipa 32 leh hmeichhia pathum an ni.

FIR la lut lo

July 6, 2023-a Kawrthah leh Rengdil inkara kuhva phur truck a kan chungchangah Kawrthah Police Station chuan nimin tlai thleng khan FIR an la dawng lo a, FIR a luh loh avangin mihring man an la nei lo.

UBI branch thar

Deputy chief minister Tawnluia chuan nimin khan a bial chhunga Khawzawl Zaingen Vengah Union Bank of India (UBI) branch thar a hawng. Tawnluia chuan, bank hnathawkte chu mirethei zawkte leh anmahni mamawha pantute lakah inhawng taka lo dawngsawng ṭhin tur te, hamṭhatna leh ṭul dangte ṭha taka hrilh zel turin a fuih a; hun rei lo têah ATM peih thuai beisei a nih thu a sawi bawk.

Accreditation card

Lawngtlai district bawrhsap David Lalthantluanga, Lawngtlai District MJA patron ni bawk chuan nimin khan Lawngtlai district-a accredited journalist pasarih hnenah Press Accreditation Card a hlan a; MJA member-te tana buatsaih Journalists' Workshop a hmanpui bawk. Workshop-ah hian IPRO C Lalhruaitluanga'n 'Journalism leh tunlai khawvel' tih thupui a sawi a, sawiho nghal a ni.

DIET-ah thing phun

Mizoram EIACP Hub chuan nimin khan Mission LiFE programme hnuaiah Van Mahotsav 2023 lawmna pualin District Institute of Education and Training, Aizawla Practicing School, Chaltlangah thing ṭiak an phun a, zirlai leh zirtirtu 76 vel an tel. Kalkhawmte chuan LiFE pualin thutiam an sawi rual nghal a ni.

Health clinic hawng

Lengteng bialtu MLA Dr L Thangmawia chuan nimin khan a bial chhunga Ngopa Chhimvengah Health Clinic Centre thar a hawng. MLA chuan, "Hun remchang hmasaah Kawlkulh Hmarvengah health clinic centre hawn a ni leh dawn a, building sak nan sorkarin cheng nuai 15 a dah tawh," a ti.