Laldenga thlànah pangpar an dah

Nimin July 7 kha MNF dintu leh chief minister hlui Laldenga thih champha a ni a, a chhungte leh MNF hruaitute'n zing karah Treasury Square-a a thlànah hriatrengna pangpar an dah.

Laldenga hriatrengna hunah hian a nupui Lalbiakdiki, MNF president Zoramthanga, vice president Vanlalzawma leh Lalthlengliana, treasurer K Vanlalauva, minister, MLA, AMC corporator-te leh MNF hruaitu eng emaw zatin pangpar an dah a; inkhawm tâwi neih a ni.

MNF president Zoramthanga chuan, Laldenga hoin kum 1961-ah hnam thuthlung ṭan a nih thu sawiin, "Movement an kalpui lai khan hma lam hun a hmu chiang bik hauh lo. Keini pawh chu tho chu kan ni," a ti a; Laldenga chi tuh chu rinnaa vuan tlattuah a ṭiak chho zel niin a sawi.

Zoramthanga chuan, MNF-in kum 62 chuang harsatna leh lungngaihna an lo hneh tawh thu sawiin, "He ram min petu, he hnam siamtu leh min kaihruaitu hian a mipuite hi kan thuthlung angin Pathian tan a ni a, a dawtah kan ram tan, Pathian leh kan ram tan kan ti. Chuvangin, kan hnam movement hi Pathian tan a ni a, chu thuthlung chu a rei tulh tulh a, a pawimawh tulh tulh a ni," a ti.

Laldenga fanu Dr Lalrinzuali pawhin thu sawiin, inremna siam hun lai khan a pa duh anga thil a thlen lohzia a pa-in a hrilh ṭhin thu leh a tum ang leh a duh ang hmang hman loa a thihsan thu a sawi a, "Ka pa khan Mizoram hi a lo va hmangaih em. Kha'ng hun zawng zawngah khan kan chhungkua a number one lem lo. Mizoram tan a nih chuan keini kha chu min sacrifice a hreh lo," tiin, harsatna tam tak an paltlang thu a sawi.

Laldenga hriatrengna inkhawm hi MNF vice president Lalthlengliana'n a kaihruai a, Rev. K Lalpiang-thara'n hunserh a hmang a ni.

Chief minister hlui Laldenga hian cancer a vei a, New York, USA-ah hun eng emaw ti chhung a inenkawl a, Mizoram pana an haw laiin, July 7, 1990 khan London-ah a thi a ni. A ruang chu July 11, 1990-ah Aizawl thlenpui niin, July 13, 1990-ah state funeral-in vui a ni a, tun thlengin Mizo zinga state funeral-a vui awm chhun a ni.