Mizoram University UG result chhuakah 100% pass result nei college 5 an awm; PUC aṭangin graduate thar an tam ber
Mizoram University-in under graduate result July 6, 2023-a a tihchhuah takah stream mala zirlai pass vekna college panga a awm. Hetih lai hian, Pachhunga University College aṭangin exam zat leh graduate thar an tam ber.
Stream mala zirlai exam an pass vekna college-te chu - Arts-ah Aizawl City College-a zirlai exam 17 leh Faith College aṭanga exam mi 12 an pass vek a; private college ve ve an ni. Commerce stream-ah Higher and Technical Institute, Mizoram (HATIM) aṭanga exam mi 33 an pass vek a, Champhai College-a zirlai exam 20-te leh St. Xavier's College aṭanga exam hmachhawntu zirlai pariatte an pass vek bawk.
Pachhunga University College (PUC) chu zirlai exam leh graduate thar tamna ber niin, B.A, B.Sc leh B.Com zirlai exam mi 898 zinga 820 an pass a, pass percentage 91.31% a ni. Hrangbana College (HBC) aṭangin B.A leh B.Com. zirlai exam 736 awmin, mi 650 (88.31%) an pass a; Aizawl College (GAC) aṭangin B.A leh B.Com-ah zirlai exam 693 awmin, an zinga 598 (86.29%) an pass. Hengte hi zirlai tamna college pathum a ni.
Mizorama arts zir theihna college 28 zingah private college pahnih - Aizawl City College leh Faith College aṭanga zirlai exam-te pass vekin, 100% pass percentage nei awm chhun an ni a; pass percentage san lama pathumna chu St. Xavier's College (96.67%) a ni. Pass percentage hniamna ber chu Lawngtlai College a ni a, zirlai 97 zinga 49 (50.52%) an pass.
B.A-ah hian PUC chu zirlai exam leh pass tamna ber niin, exam mi 543 zinga 505 (93.00%) an pass a, HBC-in dawtin zirlai exam 611 zinga 533 (87.23%) an pass. GAC aṭangin zirlai exam 600 zinga 526 (87.67%) an pass a; Johnson College aṭangin zirlai 460 zinga 336 (73.04%) leh T Romana College aṭangin zirlai 459 zinga 390 (84.97%) an pass bawk.
Arts-ah hian Aizawla sorkar college dang palite'n graduate thar 200 aia tam an nei vek a, Aizawl pawn lamah Lunglei College chu graduate thar tamna ber niin, zirlai exam 347 zinga 234 (67.44%) an pass. Hetih lai hian, sorkar college zingah zirlai exam leh pass mi 100 aia an tlemna college pasarih a awm.
Mizoramah science (B.Sc) zirna college paruk a awm a, sorkar college vek a ni. PUC chu zirlai exam, pass zat leh pass percentage-ah an sang ber a, zirlai exam 294 zinga 257 (87.41%) an pass. Pass percentage hniamna ber Kolasib College-ah 45.45% a ni thung a, zirlai 22 zinga 10 chiah an pass a ni.
B.Sc-ah hian zirlai tam lamah PUC dawttu chu Zirtiri Residential Science College a ni a, exam mi 202 zinga 165 (81.68%) an pass. Pass percentage-ah erawh chuan Zirtiri RSC aiin Serchhip College (86.96%) an sang zawk.
Mizoramah commerce (B.Com) zirna college 10 a awm a, sorkar college panga leh private college panga a ni. College 10 zingah Champhai College, HATIM leh St. Xavier's College ten 100% pass percentage an nei a; anni dawta sang ber chu PUC niin, zirlai exam 61 zinga 58 (95.08%) an pass. Pass percentage hniamna ber Faith College-ah zirlai exam panga zinga pathum (60.00%) an pass thung.
HBC chu B.Com graduate thar nei tam ber a ni a, zirlai exam 125 zinga 117 (93.60%) an pass. A dawttu GAC aṭangin zirlai exam 93 zinga 72 (77.42%) an pass a ni.
Home science (B.Sc) erawh chu Mizoramah zir theihna college pakhat, Zirtiri Residential Science College chauh a awm a, zirlai exam mi 36 zinga 24 an pass a, pass percentage 66.67% a ni.