Beichhua-a'n BJP a zawm dawn
Saiha bialtu MLA Dr K Beichhua chuan BJP a zawm dawn thu nimin khan Siaha Press Club-a thuthar thehdarhtute a kawmnaah a puang a, a zawm hun tur erawh a la sawi theih loh thu a sawi.
MNF party aṭanga chhuahtir tawh Dr K Beichhua chuan, "BJP ka zawm hun tur ka la sawi thei lo a, inthlan puan hunah a ni ang. Inthlan puan hma chu independent MLA ka ni rih ang a, BJP ka support thung ang," a ti.
K Beichhua chuan, Mizoram inthlanpui neih leh hunah Pathian leh mipui zarah BJP aṭangin MLA atan thlan tlin a nih ngei a inbeisei thu a sawi bawk.
Dr K Beichhua hi kum 2013 leh 2018 inthlanpuiah Saiha bialah MNF ticket-in MLA atan thlan tlin a ni a, December 2018 aṭangin minister of state niin, AH&Vety, Excise & Narcotics, Social Welfare leh Sericulture department-te a enkawl.
Chief Minister thu angin December 13, 2022 khan minister of state a nihna aṭangin bànna a thehlut a, January 25, 2023 khan MNF party aṭangin bàn a ni.
Dr K Beichhua chuan minister aṭanga bànna a thehluh chungchangah, Chief Minister hmuh tuma ṭum hnih a phone thu leh a hmuh theih loh ve ve thu a sawi a, "Ka thu leh hla ngaihthlak pakhat mah a awm lo. A hnuah Delhi-ah CM a zin a, a rawn haw hnuah min koin thu min zawh chian ka ring a, mahse, chutiang a awm miah lo," a ti a, December 12, 2022 khan minister of state aṭanga bànna thehlut tura tih a nih thu a sawi.
December 13, 2022-ah minister aṭanga bànna thehlut tura a kal thu sawiin Beichhua chuan, "CM hnenah 'MNF party-ah tling lo takin ka kal a, tun ang dinhmun hi ka thleng. Politics-ah chuan ka pa i ni, thil ka ti dik lo a nih chuan min kawhhmuh ka beisei a, pakhat mah ka dawng lo. I hnen aṭanga ka dawn awm chhun chu báng tura tihna chauh a ni," a ti.