Lungawi lohna lantir titàwp

Lai Students' Asso­ciation (LSA) sub-head­quarters, Sangau chuan an khuaa Blue Mountain High School-a head­master sawnna thupek sût leh zirtirtu dah belh an phût vanga lungawi lohna an lantir chu nimin aṭang khan an titàwp.

Sangau LSA thuchhuah tarlan danin, an thil phut chung­changah hian July 5, 2023 zana VC-te leh pawl dangte nen khawtlang huapa an ṭhutkhawma thu an dah angin July 6, Ningani khan Sangau khuaa VC member-te leh Young Lai Association (YLA) Sub-Hqrs Sangau hruaitute chu bialtu MLA H Biakzaua nen Sia­changkawnah an inbia a ni.

Inbiaknaah hian Blue Mountain H/S-a zirtirtu indaih loh chungchang sawiho a ni a; Mizoram sorkarin zirtirtu a lak leh hmasak berah Blue Mountain H/S-ah mathe-matics zirtirtu pakhat tal dah ngei rel a ni.

Zirtirtu nghet an neih hmain sorkarin mathematics zirtirtu leh LDC tur a rawihsak turin thu dah a ni bawk.

Sangau khawtlang hruaitute leh MLA H Biakzaua inbiakna avangin Sangau LSA chuan khawtlang hruaitute leh bialtu MLA hmalakna ngaihchàn an remti a, nimin aṭang khan lungawi lohna an lantir chu an titawp ta a ni.

LSA leh Sangaua high school leh higher secondary school zirlaite chuan June 26, 2023 aṭang khan lungawi lohna an lantir ṭan a ni.