Congress party hian Zoram mipui tan sorkar ṭha kan tiam - Lalsawta

Mizoram Pradesh Congress Committee (MPCC) president Lalsawta chuan, Mizoram mipui tan sorkar ṭha din an tiam thu a sawi a; politician-te chu pawikhawihtu, thil ṭha duh lo, duhâm leh eiru (corrupt)-a mi tam takin an ngai ṭhin chu Congress party chuan an ṭhiat vek tawh niin a sawi bawk.

Lalsawta hian MPCC Campaign Committee-in nimina Lal Thanhawla Auditorium-a mi thar lawm luhna inkhawm an buatsaihah thu sawiin, "Congress party hian Zoram mipuite tan sorkar ṭha kan tiam a. Politician, mahni aia ram dah hmasa zawkte kan hnâwl dawn a, Mizoram mipui pawh hetiang mite hi hnâwl turin ka ngen a ni," a ti.

Mi ṭha, ram siamṭhat tum Pathianin a pe zel nia sawiin Lalsawta chuan, "Politician-te hi pawikhawihtu, thil ṭha duh lo, duhâm leh corrupt-ah mi tam takin an ngai ṭhin. Mahse, hei hi Congress chuan kan ṭhiat vek tawh," a ti a; an party zawm tharte chu tih fuh tum loa Zorama khawvartir tura lo lut, hna thawk tura lut an nih thu sawiin, ram siamṭhat duh leh Mizoram tana sorkar ṭha siam tumte Congress party-ah an lut zel dawn niin a sawi.

Congress President chuan, Mizorama hnam hrang hrang leh sakhua a him theih nan BJP sorkarna paih a ngai nia sawiin, "MPCC hruaitute leh AICC hruaitute inkawmnaah Mizoramah Congress party-in sorkar ṭha, ram chhunga hnam leh sakhua humhimtu tur, BJP chakna leh pawisa ît ve lo sorkar siam a ṭul a, chumi atan chuan Rahul Gandhi pawh Mizoramah a lo kal thuai dawn," a ti.

Inkhawm kaihruaitu MPCC vice president Lal Thanzara chuan, mi ṭha tak takin Congress party an zawm chhan chu an president Lalsawta a nih thu a sawi a, "Amahah hian Mizoram mipuiin beiseina thar neiin Mizoram tana sorkar ṭha a siam ngei an ring a, Aizawl leh Mizoram hmun hrang hrang aṭangin Pu Lalsawta hoa sorkar ṭha siam duhte'n ni tin Congress party an zawm mek a ni," tiin a sawi.

MPCC thuchhuah chuan, Aizawl veng hrang hrang aṭangin mi 50 chuang Lalsawta'n Congress party-ah a lawm lut niin a tarlang.