Aizawl New Market main building sa tura UPDA department-in restricted tender hmanga a thlan, Lushai Engineers chuan performance security an thehlut tawh a; tun kar tawp emaw, kar leh tìr lamah emaw sorkar nen contract agreement an ziah theih an beisei.
New Market ṭhiah leh a thar sak tur chungchangah UDPA department chuan September 28, 2022 khan thuchhuah a siam a; September 22, 2022 khan Lushai Engineers hnenah letter of acceptance (LoA) pek a nih thu leh, Lushai Engineers-in performance security an thehluh veleh contract agreement ziah a nih dawn thu an tarlang.
Vanglaini palaiin nimina a zawhna chhangin Lushai Engineers hotute chuan, "SBI kan dàwr a, pawisa pawh kan deposit vek tawh. Vawiin khan performance security sorkarah kan thehlut a, anni'n file an buaipui zui a, an endik ve phawt ang a, tun kar tawp emaw, kar leh tìr lamah emaw contract agreement kan ziah theih kan beisei," an ti.
Agreement sign a nih a, UDPA department-in Aizawl Municipal Corporation-a tihfel ngaite an tihfel chuan hna thawk nghal turin an inpeih tawh thu leh, kháwlte pawh an inchhawp tawh thu Lushai Engineers hotute chuan an sawi bawk.
UPDA department tarlan danin, New Market sak ṭhat tur hi Aizawl Smart City hnuaia thawh tur a ni a, project hming chu 'Modernisation of Bara Bazaar - Trade Facility-cum-Exhibition Areas' tih a ni. Design siam turin intihsiak buatsaih a ni a, Catalyst Architecture thlan a ni.
Bazarpui in pui ber tur sak dan tur design uluk taka endik hnuah a sakna tura sum ruahmanin a daih dawn lo tih hriat a ni a, chumi siam rem tur chuan Aizawl Smart City Ltd. leh Project Management Consultant leh Catalyst Architecture-te'n sum ruahman an ennawn leh bawk.
New Market hi Commerce & Industries department enkawl a ni tih sawiin UDPA department hotute chuan, "Aizawl Smart City Ltd nen an inberáwn reng a, ṭhutna (seat) awm tur zatte vawi eng emaw zat tihdanglam a nih avangin DPR final chhungin hun a duh viau. Vawi eng emaw zah sawiho hnuah DPR amount cheng vbc. 42.83 a ni ta a, Mizoram sorkar chuan March 2022 khan approval a pe a ni," an ti.
