Daniel Sailo thubuai chhuina Court-ah thehluh a la ni lo

Mizoram Civil Service officer Daniel Sailo laka thubuai ziah luhah police-te chuan an thil chhuina report (chargesheet) Court-ah an la thehlut lo a, an thehluh thuai beisei a ni.

Vanglaini palai zawhna chhangin Aizawl SP C Lalruaia chuan, first information report (FIR) an dawn bawhzuiin Daniel Sailo chu an man tih a sawi a, "Thubuai siamsak a nihna hi bailable a nih angin bail-a chhuah leh a ni," a ti a; thubuai chungchang an chhui chianna Court-ah an la thehluh loh deuh thu a sawi.

Aizawl SP chuan, theihtawp chhuaha an chhui thu sawiin, "Hrem a nih dawn leh dawn loh chu kan thuneihna a ni tawh lo. Chargesheet thehluh a nih hunah Court-in ro a rêl ang," a ti.

Tarlan tawh angin, October 15, 2022 zan khan B Zalawma, Tuikual North chu Daniel Sailo, Ramhlun Venglai-in kut a thlak a; kut inthlak lai video chu social media-ah a darh nasa hle a ni.

Daniel Sailo chu October 17, 2022 tlai khan police-te'n an man a, thu an zawhfiah hnuah thubuai an siamsakna dan tlawhchhan chu bail theih a nih angin an chhuah leh nghal a ni.