N Khawbungah Vangpui Day lawm

Mizo Hmeichhe Insuihkhawm Pawl (MHIP), North Khawbung Branch chuan nimin khan an khuaah Vangpui Day an lawm a, Champhai North bialtu MLA Dr ZR Thiamsanga'n a hmanpui a, Vangpui Day lawmna pualin Rs 10,000 a hlàn.

Dr ZR Thiamsanga chuan, chhungkaw khaidingtu ber chu nute an nih thu sawiin, "Nu a fel chuan chhungkaw inrêlbàwlna a fel nge nge ṭhin. Mizoramah hmeichhiate dinhmun a ṭhain entawntlak a ni a, hna ṭha leh zahawm tak tak bakah, mawhphurhna sang tak tak hmeichhiate'n an chelh ṭhin hi an chhuanawm tak zet," a ti a; ruihhlo leh thil dangin Mizo ṭhalaite a suat nasat thu leh theihtawp chhuaha do a ṭul thu a sawi.

Champhai district child protection officer R Lalrinchhani tarlan danin, kumin April-September chhung khan Champhai district Child Welfare Committee-ah case 941 a lut a; kum 18 hnuai lam hursualna lam rawngkaia khawih leh khuaikhem tâwk mi 180 an awm a ni.