Mipuiin party mal sorkar an din dawn, hmanrua atan ZPM an duh - K Sapdanga

ZPM working pre­sident K Sapdanga chuan, kum 2023-ah mipuiin party mal sorkar an din dawn a, a hmanrua atan ZPM hman an duh thu a sawi a; sorkar kal tawhte'n Kolodyne project an chhunzawm thei lo chu an mi leh sate'n project tenau tê tê an chhawr vang a nih thu a sawi bawk.

K Sapdanga hian nimin khan Tipa (Tuipang)-a vantlang inkhawm­ah thu sawiin, "Mizo­ramin hydro electric potential a neih len ber chu Kolodyne project a ni. Mi thiamte'n ṭha an ti si a, mahse, sorkar kal tawhte'n an chhunzawm hlei thei lo. Project tê tak tê an tuipui a, an mi leh sate'n an chhawr vang a ni mai. A chhunzawmtu lâr ber chu ACB an ni," a ti.

Mizorama hydel project-te chhit theiha bar a awm loh laiin, a siamna bill táng a awm lo tih sawiin Sapdanga chuan, "Tuirial lah NEEPCO kutah kumkhua atan kan pe daih a, ba thangah kan inâwk ta a ni," a ti a; chhim bial hawisantu sorkar thlah liam turin mipui a sáwm.

ZPM Working President chuan, ram leilung hausaknaah chhim bial a ṭha hle tih sawiin, "Agriculture hmalakna atan hmun ṭha tak tak a awm a, undivided Chhimtuipui district hi Mizoram eibàr innghahna a ni thei tih a chiang. He hmun ṭha tak hi sorkar kal tawhte'n an hawisan rei lutuk a, mak kan ti a, keini chuan he lunghlu tlahlang hi chhar ngei kan tum," a ti.

Kum 2023 inthlanpui atan political party-te an inbuatsaih tih sawiin Sapdanga chuan, "Keini aia inbuatsaih ngawrh chu neutral mipui an ni. Tun ang reng rengin neutral mipui an la phûr ngai lo," a ti a; sorkar mekte chu zan thim hnuaia mangchhe mang ang maiin an mangang niin a sawi.
K Sapdanga chuan, tuna Mizoram mamawh ber chu hruaitu mumal, mumanga innghat lo hruaitu a nih thu sawiin, "A dik lo a ni tih chiang ngawih ngawih pawh tuipui tlat hi mipuite’n an kham tawh. Sorkar hnathawkte’n sorkar thar an nghakhlel a, thu thar lawmawm pawl chu 'A hun takah hlawh kan la thei ang' tihte a ni," a ti. "ZPM thil tum bulpui pakhat chu ram rorelnaa Pathian ram tun din a ni," tiin, ZPM sorkartir tura inbuatsaih turin mipui a sáwm a ni.

MLA Lalchhuanthanga pawhin thu sawiin, ZPM innghahna chu kalphung thar a nih thu a sawi a, "ZPM chuan mipui sorkar siam a tum a, hei hi party dangte'n an huphurh. Kalphung tharah chuan CM-in work department a chang dawn lo, minister-te portfolio a enpui ang a, inthlahdah te, eiruknaa inhnamhnawihte a thiang ve dawn lo," a ti.

Tuipanga inkhawmah hian ZPM zawm thar mi thar 111 lawm luh a nih thu ZPM thuchhuah chuan a tarlang.