Chhandama'n infiamna tihhmasawnna tur leh chaw ṭha pekna tur programme a hawng

School Education minister Lalchhandama Ralte chuan nimin khan Serchhip BRC Hall leh Hnahthial Middle School-ah zirlaite hnena chaw ṭha chawhpawlh pekna tur leh infiamna tihhmasawnna tur programme a hawng.

Minister chuan, Sri Sathya Sai Annapoorna Trust Bangalore leh Mizo­ram sorkarin inremna an neih angin, Serchhip leh Hnahthial district chu zirlaite hnena chaw ṭha chawhpawlh pekna pilot project atan thlan a nih thu a sawi a, "Naupangte'n chaw ṭha chawhpawlh thla thum an ei hnuah an rih dan leh hriselna endik a ni ang a, danglamna a awm ngei beisei a ni," a ti a; chaw ṭha ei dan tur ang taka naupangte pe tur leh ei zat tur ngai pawimawh turin zirtirtute a chah.

Grassroots Level Sports Development Prog­ramme atan sport asso­ciation panga nen thawh­hona siam a nih thu sawiin Minister chuan, "District 11-a centre 40-ah kalpui a ni dawn a, New Education Policy 2020-in sport hi zirna pangngaiah a dah a, state sorkarin industry-ah a puang tawh bawk. Chumi bawhzui nan chuan sport lama zirlaite dâwm kânna tur programme kalpui a ni," a ti.

Lalchhandama Ralte chuan, School Education department chu mihring chherna a nih avangin department dang zawng aiin a pawimawh thu te, sikula thawkte chu an thawhna ṭheuhte mission field a ni tih hriaa entawn tlak nun nei tur te, khawvel ṭhan dan mila inbuatsaih tur leh, khawtlangin anmahniah chhiar tur an hmuh theih nan ṭan la turtein a chah a ni.

Sri Sathya Sai Annapoorna Trust hian India ram state 23 leh union territory pali-ah chaw ṭha pek an kalpui mek a, an chaw ṭha pek chu Sai Sure tih a ni. Chaw ṭha chi hrang hrang chawhpawlh a ni a, kum 6-16 inkar tan an ni tin eitur ṭha mamawh 50% phuhru thei tura ngaih a ni. Serchhip leh Hnahthial district-ah hian naupang 2,000 ve ve hnenah pek a ni dawn a, chawchhun belhchhah nan hman a ni ang.

Grassroot Sports Development Programme-ah hian football, hockey, boxing, badminton leh weightlifting-te kalpui a ni dawn a; sport association-te'n coach tur an ngaihtuah ang a, Samagra Shiksha-in an hlawh a tumsak dawn a ni.