MZP-in Darzo-ah inkhawmpui an hmang

Mizo Zirlai Pawl chuan October 25, Thawhlehni leh nimin khan Darzo khuaah Assembly vawi 66-na an hmang a, thupui chu, 'Zirlaite - Zo fate leh Zoram tan' tih a ni.

MZP inkhawmpui hi Thawhlehni khan minister Dr R Lalthangliana, South Tuipui bialtu MLA-in a hmanpui a; zirlai pawlte chu ram leh hnam hmasawn zelna tura pawl pawimawh berte zinga mi an nih thu sawiin, chak taka kal zel turin duhsakna a hlân.

Dr R Lalthangliana chuan, MZP thil tum zinga mi, kut hnathawh uar leh chawisan leh, Mizoram leh hnam tana mi ṭangkai ni tura zirlaite buatsaih, tihte chu a ngai pawimawh zual thu sawiin, "Zirlaite'n thawh hreh nei lo u la, hnam dang ṭhalaite tih theihte in ti ve thei a ni tih inhriain, huaisen takin hma lam pan ang che u," a ti a; zirlaite chu thiamna tak tak neih tum turin a chah bawk.

MZP Assembly-ah hian palai 800 chuang an tel a, Thawhlehni zing khan Darzo khuaah faina hnatlangpui neiin, khawlai leh hmun hrang hrang an tifai a ni.

MZP hi October 27, 1935-ah din a ni a, thupui chu 'Ṭanrual hi chakna' tih a ni. Tun dinhmunah MZP headquarters 13, sub-headquarters 47 leh branch 102 a awm mek.