Tualteah Tomato Festival hman a ni

Tualte khua chuan October 25, Thawhlehni khan an khaw YMA hall-ah Tomato Festival an buatsaih a, bialtu MLA Tawnluia, dy. chief minister-in a hmanpui.

Tawnluia chuan Tualte khuain Tomato Festival an buatsaih chu lawmawm a tih thu sawiin, "Tualte tomato thar chhuahnaah hian neituah ka inngai ve a ni. Tualte khua tan tomato chin uar zel a ṭha. Mizoram pum huapin tomato neitu nihna hauh tlat a ṭul," a ti.

Dy. Chief Minister hian Tualte Tomato Growers' Co-operative Society Ltd. (TTGCS) siam Tomato Ketchup, Rs 40 man chu mipuite lei theih turin a tlangzarh nghal.

Tualte khuaah hian kum 2018 a KVK hmalaknain tomato chin chhin a nih hnuah, kum 2019 khan Tualte Tomato Growers Association dinin, Horticulture department leh KVK hmalaknain chhungkaw 24-in tomato hi eizawn nan an ching ṭan a ni.

Tomato ching hi pung chho zelin kum 2021 kumtawp lamah Tualte Tomato Growers Association chu Tualte Tomato Growers Cooperative Society Ltd. tia thlakin, society hnuaiah hian Primary Agriculture Credit Society kalpui a ni. Tunah hian tomato chingtu chhungkaw 223 chu society-ah hian chanpual neiin an awm mek a ni.

Tualte khua-a tomato chingtu chhungkaw 135-te chuan kum 2021-ah grade A aṭangin Rs 2,53,90,000 leh grade B aṭangin Rs 6,42,000 lei chhuakin, kuminah hian chhungkaw 223 in October 23 thleng khan grade A aṭangin Rs 2,74,33,602 leh grade B aṭangin Rs 3,02,740 an lei tawh a ni.