Grape wine pe lêt turin phût nawn

MPYCC chuan thuchhuah siamin, Mizoram sorkar chu grape wine chungchanga kalphung mumal nei loah an puh a; May 27, 2022-a grape wine an mansakte chu pe lêt vek turin sorkar an phût nawn.

Congress ṭhalaite chuan, chief minister Zoramthanga'n Cham-phai Winery a tlawhnaah, grape wine hralh dan turah project mumal tak siamin hma an lak dawn thu a sawi chu vanduaithlak an tih thu an tarlang a, "Kum 2007-a MIP pawisa hmanga bul ṭanpui tawhtuin vawiinah hmalakna mumal an la nei lo leh hmalakna thar tur a la sawi chauh hi hmûi chauha kut hnathawktute hmangaih ṭhin tih buichhia laih loin a inpuang niin kan hria," an ti.

MPYCC chuan, May 27, 2022 khan Champhai Winery siam grape wine zuartu Lalhriatpuii (L) chu Millennium Centre-a a dàwr aṭangin a grape wine zawrh lai tam tak chu Excise & Narcotics Minister thupek angin man a ni tih an sawi a; "A bo a bâng awm loa bungrua pe lêt tur leh zangnadawmna pe turin Mizoram sorkar kan ngen nawn leh a ni," tiin, Lalhriatpuii bungrua man tawhte pe let vek tura Excise Minister an ngen tawhna chu an dinna a la ni reng tih an tarlang a ni.