Hindi teacher interview boycott ṭhulh

Mizo Hindi Zirlai Pawl (MHZP) General Headquarters, Aizawl chuan, Hindi zirtirtu 50 lak turah document lem a awm nia an hriat avangin boycott an tum chu sorkar thuneitute'n hma an lak avangin an ṭhulh tih an tarlang.

MHZP chuan thuchhuah siamin, Samagra Shiksha hnuaia Hindi teacher 50 lak turah diltu zingah D.El.Ed. document hmang an awm thu an dawng a, an bawhzui nghal tih an tarlang a, "Education Minister leh Samagra Shiksha hotute thil awm dan sawipui an ni. Cross checking neih leh interview board-in fimkhur taka an kalpui tur thu leh interview hun tur pawhsei a nih tâk avangin October 26-a interview ṭan tur boycott kan tum chu ṭhulh a ni," an ti.

Samagra hnuaiah high school leh middle school Hindi zirtirtu 50 lak tur chu lawmawm an tih thu sawiin MHZP chuan, "Sorkar leh department-in theihtawp chhuaha dik taka hmalakna kalpui a tum lai dik lo taka thil ti duh kan awm hi pawi kan tiin kan dem tak zet," an ti a; document felhlel hmang an awm ngei a nih chuan an phu tâwka hrem turin sorkar leh Education Minister an ngen tih an sawi bawk.