Covid-19 vei mi pakhat thih belh

October 25, Thawhlehni khan Mizoramah swab sample 261 endik aṭangin Covid-19 vei mi pasarih hmuh chhuah a ni a, positivity rate 2.68% chiah a ni. Nimin khan hripui vei dam tawh mi pariat chhuahtir an ni a, Covid-19 vei mi pakhat a thi.

IDSP aṭanga thu dawn danin, Thawhlehnia hripui vei hmuh chhuahte chu Lunglei district-ah mi pathum, Aizawl district-ah mi pahnih leh Serchhip leh Khawzawl district-ah mi pakhat ve ve an ni.

Hripui vei enkawl lai Lalrinzuala (39), Venghlui, Aizawl chu October 25, Thawhlehni zan dar 11:10 khan State Referral Hospital-ah a thi a; thla khat chuang kal ta, September 21 hnua thi an awm lehna hmasa ber a ni. Amah hi Covid-19 positive a ni tih October 20, 2022 khan hmuh chhuah a ni a, natna dang nei tel a ni.

Mizoramah swab sample 19,87,501 endik tawh niin, Covid-19 vei 2,38,770 hmuh chhuah a ni tawh a, a pumpuia positivity rate 12.01% a ni. Nimin tlai dar 3 thlengin mi 2,38,007 (99.68%) chhuahtir an ni tawh a, mi 724 (0.30%) thi tawhin, enkawl mek mi 39 (0.02%) an awm.

Mizorama district 11 zinga district panga - Siaha, Champhai, Kolasib, Lawngtlai leh Hnahthial district-ahte Covid-19 vei an awm tawh rih lo a; positive mek mi 10 aia tam awmna Aizawl leh Saitual district chiah a awm a ni.