KHAWTHLIR

Thisen pe
Lunglei College NSS chuan hnimin khan an college-ah thisen pek an huaihawt a; Lunglei Civil Hospital tan thisen unit 64 an pe a, petute mipa 37 leh hmeichhia 27 an ni.

YMA rorel inkhawm
Vawiin hian Thingsulthliah khelmuala pandal sakah YMA Rorel Inkhawm vawi thumna neih a ni dawn. Ruahman dan chuan, chawhma dar 10 aṭanga tlai dar 4 thleng Central YMA president R Lalngheta kaihhruaiin rorel a ni ang a, lawmman chi hrang hrang sem nghal a ni ang. Zan dar 6:30-ah vantlang inkhawm neih a ni dawn a, CYMA general secretary Prof. Lalnuntluanga'n kumpuan thupui a sawi ang a, kumpuan lawmman sem a ni ang.

Zirtirtute zirtir
District Institute for Education and Training (DIET), Aizawl chuan October 25, Thawhlehni aṭang khan an conference hall-ah zirtirtute tan thil pawimawh hrang hrang zirna an buatsaih a, October 29, 2022 thleng a awh dawn. Training-ah hian Aizawl leh Saitual district-a Mizo leh social science subject zirtirtu mi 100 koh an ni.

MLA-in hawng
Mizoram Chess Association leh Champhai District Chess Association ṭangkawp buatsaih 22nd Mizoram Open Chess Championship 2022 chu nimin khan Champhai Kahrawt Venga Vanlallawma Indoor Stadium-ah Champhai North bialtu MLA Dr ZR Thiamsanga'n a hawng a, ṭanpuina Rs 50,000 a hlân. Inelnaah hian mi 45 vel an tel a, naktukah zawh a ni ang.

Heroin man
Mizoram Police-a Special Narcotic team chuan October 25, Thawhlehni khan Tuikual North-ah heroin gram 53.570 an man a, a neitua puh Lalchhanchhuahi (38) w/o John Lalmalsawma, Tuikual North, Lalṭhazuala (29) s/o Ramdina, West Phaileng leh Lalrinhlua (29) s/o Lalhluna, Bethlehem Vengte an man bawk.

CSC-ah dil theih
Aizawl district bawrhsap Dr Lalhriatzuali Ralte chuan hun eng emaw chen common service centre (CSC) aṭanga tribal/residential/income certificate pek chhuah tihtawp chu October 24, 2022 aṭangin CSC-ah dilna thehluh theih a nih leh tawh thu a puang.

Alu chîn inzirtir
Krishi Vigyan Kendra, Siaha chuan nimin khan Chhaolo, Lopu, Siata, Naohtlah, Zyhno ,Tisi khuaa loneitute tan alu chi (Kufri Jyoti) leh natural farming chungchang zirhona an buatsaih a, kut hnathawktu mi eng emaw zat an tel.

Community centre hawng
Lengteng bialtu MLA L Thangmawia chuan nimin khan Khawkãwna community centre sak thar a hawng. MLA chuan, Khawkâwn chu ramri hnaih khua a nih angin thil thar la awm tur a la awm nual thu leh tunah chuan sorkar sum dinhmun a ṭhat rih loh avangin hmalak zung zung a harsat rih thu a sawi. Community centre hi Border Area Development Programme sum nuai 20 hmanga sak a ni.