Health care-a inziaklut an pun theihna atan theihtawp chhuah a ṭul - Governor

Governor Hari Babu Kam­bhampati leh Health & Family Welfare department hotute chu nimin khan Raj Bhavan-ah an inkâwm. Governor chuan, health care scheme hnuaia inziak lut an pun theih nan theihtawp chhuah a ṭul thu a sawi.

Hari Babu Kam­bhampati chuan, district hospital ṭhenkhatah specialist doctor dah tur an váng chu pawi a tih thu sawiin, "He harsatna hi a tuartu chu damlote an nih avangin a rang lama chinfel a ngai a ni," a ti.

Health department hmalaknate chu state mipui tana thil pawimawh ber pakhat a nih thu sawiin Larsap chuan, "Tun dinhmunah thawk ṭha thawkhat mah ula, ṭan lakna tur kawng tam tak a la awm," a ti a; Mizorama ramhmul damdawi siam turin hmalakna a awm ṭan chu ṭha a tih thu a sawi.

Governor chuan, Health depart­ment chu Mizo ramhmul damdawi siamchhuaktute'n certification an neih theih nan ṭanpui se ṭha a tih thu a sawi a; ramhmul damdawi hriat tlanglàwnte chu la khawm tur leh zir chian atan Ministry of Ayush hnenah thehlut turin Health department a ràwn bawk.

Health Services leh Health & Medical Education, National Health Mission, Zoram Medical College, MSACS leh programme ṭhenkhat hmalaknate sawiho a ni a; department hotute chuan, an hmalakna ṭhenkhat, sokar laipuia nawr ngaite chu Ministry of Health & Family Welfare-a bawhzuipui turin Governor an ngen a ni.

Inkawmnaah hian Health secretary Esther Lal Ruatkimi leh principal director Dr T Lal­hmangaihi, HME director Dr KK Chhetri, ZMC director Dr John Zohmingthanga, NHM mission director Dr Eric Zomawia leh programme ṭhenkhat hotute an tel.