Home minister Lalchamliana chuan, Central YMA-te'n Supply Reduction Service (SRS) dina ruihhlo do beihpui an thlâk kha a hlâwk hle thu leh, CYMA leh SRS-in ruihhlo an do dan ang kha tunah hian Mizoramin a mamawh hlea a hriat thu a sawi.
He thu hi Home Minister hian Assam Rifle-te'n ‘Anti Drugs Awareness Campaign’ hawnna, nimina 2nd Assam Rifles Loch Hall-a neiha a sawi a ni a; AR Anti Drugs Awareness Campaign hi June 20, 2022 thleng awh tur a ni.
Home minister Lalchamliana chuan, CYMA-te'n kum eng emaw zat kal taah SRS dinin, ruihhlo do beihpui an thlak thu sawiin, "An hmalaknate khan nasa takin ruihhlo donaah Police, Excise leh Assam Rifles-te a pui. Khatianga ruihhlo dona kha tunah hian kan ramin a mamawh hlein ka hria. Kohhran leh páwl hrang hrangte'n an hmazawn ṭheuhah ruihhlo do nan nasa takin hma an la a, an hmalaknate hi tun aia nasa zawka kan kalpui a ngai a ni," a ti.
Ruihhlo tih leh damdawi hman sual chu mimal maiin an tuar lo tih sawiin Lalchamliana chuan, "Chhungkua, khawtlang leh ramin kan tuar a ni," a ti a, Mizorama chhungkaw zahve aia tamin ruihhlo avangin an tawrh thu a sawi.
Home Minister chuan, Assam Rifles-in ṭhalai leh khawtlang huapa ruihhlo ṭhat lohzia inzirtirna an buatsaih chu lawmawm a tih thu sawiin, "Tun hnaia Social Welfare department-in ruihhlo khawih ṭhin chungchang survey an neihah ṭhalaite bakah tleirawl te, middle school naupangte pawh ruihhlo, ganja leh dendrite-ah an inhnamhnawih a, an khawih ṭhin tih hmuh chhuah a ni," a ti.
Assam Rifle 23 Sector DIG Brig. Digvijay Singh pawhin thu sawiin, Mizoram chu khawvela ruihhlo hmunpui tia sawi, Golden Triangle hnaiha awm a nih avangin a tuar nasa tih a sawi a, "Mihring cheng zat ngaihtuahin ruihhlo ngai an tam a, hei hi ngaihtuahawm tak a ni," a ti a; Mizoram leh Mizo mipuite chu kawng hrang hrangah, a bikin traffic rules zawm danah a ṭha zawngin ram pumah a hming a than mek laiin, ruihhlo donaah hma nasa takin a lak a ngaih thu a sawi.
June 7-20, 2022 chhunga neih tur Anti Drugs Awareness Campaign hi Assam Rifle chuan chhâwng thumin kalpui an tum a, ṭhalaite an tinzâwn ber. Campaign hawnnaah hian sikul hrang hranga zirlai eng emaw zat leh tlawmngai pawl aiawhte an tel a ni.
