
Silchar-a hralh tur tomato vailiam
Tualte Tomato Growers’ Cooperative Society Ltd. thar tomato quintal 162 chu Silchar, Assam-a hralh turin nimin khan Horticulture Directorate kawt aṭangin deputy chief minister Tawnluia'n a vailiam.
Deputy Chief Minister chuan, Horticulture department-in kut hnathawk-tute tana hma a laknaah hmasawnna chi hrang hrang hmuh tur a awm thu a sawi a, "A hlâwkna téltute chu Tualte-a tomato chíngtute an ni. Tualte khua an hlawhtlinna chhan chu khawtlang an ṭan rual bakah ṭhalaite an phûr a, an tui em vang a ni," a ti.
Tawnluia chuan, kut hnathawktute thar chhuah ngei Mizoram mai bakah Mizoram páwna hralh theiha a awm chu ropui a tih thu sawiin, "Kut hnathawktute intodelhna kawngah hma hruaitu ni ngei se ka duh," a ti a; Mizorama tharte hmangin intodelh theih ngei a nih a rin thu a sawi.
Tomato vailiam inkhawmah hian Horticulture Development Board vice chairman Prof. F Lalnunmawia, MLA leh Horticulture director Dr Elizabeth Saipari te pawhin thu an sawi.
Tualte khuaah hian kum 2019 khan Tomato Growers’ Association din a ni a, Horticulture department leh KVK-te puihnain chhungkaw 24-in tomato an chíng ṭan. Kum 2021-ah Tualte Tomato Growers’ Cooperative Society Ltd. hming puin society ngêlnghet takin an awm a ni.
Society hnuaiah Primary Agriculture Credit Society (PACS) kalpui mek a ni a, tomato kung 1,000 chin neite chu member-ah ziah luh an ni. Kum 2022 kal mekah tomato chíngtu chhungkaw 210-te'n society-ah share neiin, tomato thar seng mek chu chhungkaw 120-te ta a ni.