June 2022 ral hmaa Myanmar kuhva Dan loa tawlh rutute man turin phût

Hachhek Bial Kuhva Chingtu Pawl (HBKCP) chuan Myanmar aṭanga dan loa kuhva tawlh rûk titawp vek tur leh June 2022 ral hma ngeia Myanmar kuhva dan loa Mizorama tawlh rutute man tur leh hrem turin chief minister Zoramthanga an ngen. An ngennain awmzia a neih loh chuan a theihna apiangah zualko an tum.

HBKCP hian Central YMA nen an inbiak remna anga Chief Minister an hmuhho hnuah, CM Zoramthanga'n thuràwn a lo pek angin June 6, Thawhṭanni khan ngenna lehkha an thehlut a ni.

Dan loa Myanmar aṭanga kuhva sumdawnna kalpuitute chu Mizorama kuhva chíngtute kuhva hralhnaa harsatna thlentu an nih avangin June 2022 ral hma ngeiin kuhva tawlh rutute man chhuak tur leh hrem ngei turin HBKCP chuan an ngen a; Mizorama Myanmar kuhva zawng zawng chu tihral vek a, a dahna kudamte pawh ṭhiah vek a nih theih nan hma la turin sorkar an ngen bawk.

HBKCP chuan, an kuhva chìn chi hnih, fûr laia thar leh ṭhál laia tharte chu harsatna nei loa hralh theih an duh thu tarlangin, Assam-a Patharkandi bialtu MLA-in Mizorama thar kuhvate ‘Burma kuhva’ anga a puh tlat avanga harsatna an neihte chu Karimganj district sorkar hotute hnenah hrilhfiah turin Mizoram sorkar an ngen a; Mizoram sorkarin Mizorama thar ngei a ni tih hriattirna pe thei se an duh thu an tarlang.

Hachhek bial mipui eizawnna ber kuhva huan changtlung zawk leh hlawhtling zawka kalpui a nih theih nan HBKCP chuan kut hnathawktute dàwr phak mithiam, damdawi leh leiṭhate mipui ban phâka ruahman turin Mizoram sorkar an ngen nghal a; Mizorama kut hnathawktute himna ngaihtuah chungin kuhva chauh ni lo, ram dang aṭanga dan loa thlai leh thil lak luhte titawp thuai turin an ngen bawk. HBKCP hian Mizoram sorkara an ngenna chu a hlawtling lo a nih chuan a theihna apiangah zualkoa thlen a tum a ni.