Taxi enkawltute tana training chhunzawm

Taxi khalhtu leh enkawltute tana thil pawimawite inzirtirna ‘Training for taxi drivers/operators’ chu nimin khan Vanapa Hall-ah chhunzawm a ni a, Transport minister TJ Lalnuntluanga’n a hmanpui.

TJ Lalnuntluanga chuan, public transport driver-te tana intuaitharna neih chu ruahman lawk a nih thu leh hripui léng avanga hmalak mai theih a nih loh thu a sawi a, training neih a nih theiha tura hma latute leh sum tumtu SIRDPR chungah a lawm thu a sawi.

Lirthei khalhtute an pawimawh thu sawiin Minister chuan, “Ram economy hi driver-te kutah thui tak a innghat a, chuvang chuan hnam hmangaihna thinlung kan put a ngai. Mi dangte tan malsawmna thlentu pawimawh tak kan ni a, mahse, mi tlemtê avangin kan hmai a bâl fo. Kan inzirtir a, kan infuih a, hma kan sawn zel a pawimawh,” a ti a; dân zâwm chunga fimkhur taka lirthei khalh ṭhin turin a chah.

Training-ah hian taxi driver mi 785 an tel a, Transport director R Lalrammawia’n a kaihruai. Lirthei khalhtute tih tur leh tih loh tur leh awm dan mawi te, lirthei kaihhnawiha dan chungchang te, lirthei khalhtute mawh-phurhnate an inzirtir a ni.