
MPYCC-in grape wine-a sorkar thutlukna Puang vat turin Mizoram sorkar an phût
MIzoram Pradesh Youth Congress Committee (MPYCC) chuan, grape wine chungchangah sorkar thutlukna dik tak puang vat tur leh grape chíngtute leh an thawh rah zuartute chungthu rél fel vat turin Mizoram sorkar an phût.
MPYCC thuchhuah chuan, sorkar leh grape chingtute inkara inhriatthiam tawnna hmanga grape wine zawrh chhuah a nih laiin, Excise & Narcotics Department (END) chuan thuneitu sang aṭanga thu an hmuh angin May 27, 2022-ah Aizawlah grape wine tam tak an man tih a tarlang a, “Grape wine zuartute leh Champhai leh Hnahlana grape chíngtuten harsatna nasa tak an tawh phah ta mek. Mizoram sorkar hian thu leh hla mumal tak nei vat a, kut hnathawktute leh an thawhrah zuartute chungthu rél fel vat turin kan ngen a ni,” a ti.
Congress ṭhalaite chuan, “END minister Dr K Beichhua’n grape wine an mante chu zu an check-na lama man palh nia a sawi laiin, June 6, 2022-a END thuchhuak chuan MLP Act 2019-ah thil tuiril alcohol pâi tel reng reng chu man theih a nih thu thuchhuah an siam leh thung,” an ti a; Mizoram sorkar chu MLP Act leh MLP Rules a pawm danah grape wine chungchanga a thutlukna chiang taka puang vat turin an phût a ni.
END minister K Beichhua’n June 2, 2022-a Kolasib-a press mite a hmachhawnnaah Millennium Centre-a grape wine an manna neitute’n zu, beer leh Korean wine an kawl tel thu a sawi laiin, MC-a dawr neitute chuan END Minister-in a puhna chu thu dik lo a nih thu an sawi tih tarlangin MPYCC chuan, “State pakhat minister meuhin mipui hriata thu dik lo a lo sawi a nih chuan MC-a dawr neitute leh Mizoram mipui hnenah ngaihdam a dil kan phût bawk,” an ti.