Lokayukta-in thubuai 45 an ziak lut tawh

Mizoram Lokayukta chuan a din aṭanga nimin thleng khan eirûk thubuai chi hrang hrang 45 an ziak lut tawh. Thubuai ziah luh 45-te chu preliminary enquiry neih tura thutlukna siam a ni a; chutih laiin, complaint lut zinga pathum chu preliminary enquiry ti loin tihtawp a ni.

Lokayukta hian inves­tigation wing a neih loh avangin chhui lailâwkna (preliminary inquiry) ti turin Anti-Corruption Bureau (ACB) leh Central Bureau of Investigation (CBI)-ah thubuai a thawn thei a; CBI-in enquiry an tih dawn chuan state sorkarin phalna a pek a ngai.

Preliminary enquiry tih hnuah thubuai 45 zinga thubuai 13 chu tih­tawp a ni a, thubuai 17-ah chuan preliminary hearing nei tura order siam a ni. Preliminary hearing neih a nih hnuah thu­buai pali tihtawp a ni bawk.

Thubuai pakua chu chiang zawka chhui (regular investigation) turin thutlukna siam a ni a, regular investigation report hi Lokayukta chuan dawn a la nei lo.

Mizoram Lokayukta chairman hmasa ber leh ni mek Lalsawta chu March 19, 2019 khan lak luh a ni a, chuta ṭang chuan Lokayukta hian a tak takin hna a thawk ṭan a ni. Tun dinhmunah investigation wing an la nei lo a, prosecution wing-ah erawh chuan mi pakhat an nei tawh a ni.