HSSLC-a tiṭha Mizote chawimawina hlân

Mizo Students’ Union (MSU) Gen.Hqrs chuan nimin khan Chanmari YMA Hall-ah Higher Secondary School Leaving Certificate (HSSLC) Examination 2022-a ti ṭhate chawimawina hun an buatsaih a, School Education minister Lalchhandama Ralte-in a hmanpui.

Education Minister chuan, Covid-19 avangin zirlaite’n harsatna tam tak an tâwk tih sawiin, "Zirna kalpui hleih theih a ni lo a, zirlai tam tak an hnufual phah a ni," a ti a; zirlaite chu hnam hmangaihna nen lehkha zir tura chahin, "Ram tana inpekna tel lo chuan thiamna a san poh leh hnam boralna kawng a sang mai a ni," a ti.

Lalchhandama Ralte chuan, all India service-ah Mizo an lan tlem zel avangin ṭan lâk thar a ngai hle tih sawiin, "Mizoram state zirna hi India ram chhungah a hniam bik lo a, syllabus, method, transfer & posting-ah pawh kalphung thlak hret hretin, NEP 2020 kalphung zawmin CBSE zûlzuia kalpui a ni," a ti a; zirna chu Mizo hnam hmangaihna rilru tuh thar nan sorkarin a remchan danin a kalpui tih a sawi.

Chawimawina inkhawmah hian Arts, Science leh Commerce-a Mizo zirlai bika a ti ṭha zual pathum (top-3)-te hnenah chawimawina hlan a ni a; kut ṭha lo chunga HSLC-a distinction-a pass Lalhmangaihzuali, Kawnpui hnenah lawmpui nan MSU Special Award hlan a ni bawk.