District 4-ah hripui vei an awm rih lo

June 6, Thawhṭanni khan Mizoramah Covid-19 vei mi 30 hmuh chhuah a ni a, hripui vei hmuh thar zat pung leh hret mah se, district pali-ah hripui vei an awm tawh lo.

Nimin khan hripui vei dam tawh mi 23 chhuahtir an ni a, Covid-19 positive thi an awm lo.

Thawhṭannia Covid-19 positive hmuh chhuahte chu mipa pariat leh hmeichhia 22 an ni a; ZMC RT-PCR laboratory-a hmuh pahnih, TrueNAT hmanga hmuh pakhat leh Rapid Antigen Test hmanga hmuh 27 niin, positivity rate 7.94% a ni.

IDSP record angin, Mizoramah Covid-19 vei 2,28,434 hmuh chhuah a ni tawh a, mipa 1,06,351 leh hmeichhia 1,22,083 an ni a, mipa aiin hmeichhia 15,732-in an tam zawk. Nimin tlai dar 5 thleng khan mi 2,27,640 (99.65%) chhuahtir an ni tawh a, mi 700 (0.31%) thi tawhin, enkawl mek mi 94 (0.04%) an awm.

Nimin tlai dinhmun angin, Mizorama district 11 zinga district pali-ah Covid-19 positive an awm tawh rih lo a, chu'ngte chu Siaha, Champhai, Lawngtlai leh Hnahthial district-te a ni.

Positive enkawl lai mi 10 leh a aia tam awmna district pali a awm a, positive tamna ber Mamit district-ah mi 27 an awm a ni.