SEDP nghak hrâm hrâm turin chah

MNF treasurer K Vanlalauva chuan, SEDP chu a tahtawlin siam rem zel a ni dawn tih sawiin, chî-âi loa nghak hrâm hrâm turin Mizoram mipui a chah.

K Vanlalauva hian June 6, Thawhṭanni khan MNF Tuirial West Block-in Awithangpa Hall, Kawnpuia political training an buatsaihah thu sawiin, “Kumin budget tur hi kan hmang ṭan leh dawn chauh a, kan flagship programme SEDP pawh ruahmanna felfai takin kan kalpui ṭan mek zel a, kan chhunzawm zel dawn. Mipuite chî-âi loa nghak hram hram turin ka duh hle a, kan hotute’n a tahtawl tê têin an siam rem zel dawn a ni,” a ti.

MNF Treasurer chuan, eptu party hruaitu ṭhenkhatte chu MNF tana theihtawp chhuahtute an nih thu te, mi ṭhenkhatin media kaltlangin MNF chu buai ṭhin angin sawi mah se, thu dik hre chiang loa ṭawng mai mai lo tur leh bèlchiang phawta thu dik thehdarh ṭhin tura a duh thu a sawi bawk.