KHAWTHLIR

Thisen pe
Evangelical Church of Maraland KTP, Siaha Edenthar Branch chuan nimin khan Siaha District Hospital tan thisen unit 25 an pe a, petute mipa 20 leh hmeichhia panga an ni.

Sangau PHC hawng
Agriculture Development Board vice chairman H Biakzaua, MLA chuan nimin khan a bial chhung, Sangau damdawi-in (Primary Health Centre) sak thar a hawng. Sangau PHC hi State Priority Programme (SPP) 2018-19 kal tlanga sum hmuh Rs 1,45,74,900 hmanga sak a ni a, December 17, 2019-a sak ṭan, April 10, 2021-a sak zawh a ni.

Student aid fund
Pachhunga University College chuan tun hnai khan an Students Aid Fund aṭangin zirlaite hnenah ṭanpuina sum an sem. Fund-ah hian zirlai 75 hnenah Rs 6,000 ṭheuh pek a ni a, a vaiin Rs 4,50,000 an sem chhuak a ni.

In 11,398 tlawh
Mamit District Task Force on Immunization chu an chairman Lalnunhlua, district bawrhsap hoin nimin khan an ṭhukhawm. Mamit district-ah Covid-19 vaccine dose 1,02,064 pek tawh a ni a, vaccine pein khaw 74-ah in 11,398 tlawh chhuah a nih tawh thu tarlan a ni.

PMMSY thlirho
Fisheries minister K Lalrinliana hoin nimin khan Pradhan Mantri Matsya Sampada Yogana 2020-21 (PMMSY) hnuaia hmalakna leh PMMSY 2021-22 atana hmachhawpte thlirho a ni. Scheme hnuaiah hian sangha dil siam leh khawi kaihhnawih ṭanpuina chi hrang hrang pek ṭhin a ni.

MLA-in hmanpui
MLA Lalrindika Ralte chuan nimin khan a bial chhunga Kawrthah Zone Football Tournament final, Kawrtethawvenga khelh a hmanpui a, "Kan tum phawt chuan Mizo ṭhalaite hian hlawhtlin theih lohna chhan tur kan nei lo," tiin, Pathian ṭihna nen theihtawp chhuaha hlawhtlin tum turin a fuih. Inelnaah hian team 16 an tel a ni.