Zirlai uniform inang tláng rawng tur thlang Common uniform hman hun tur la hriat loh

Mizoram sorkar hnuaia sikulte zirlai uniform inang tlang (common school uniform) hmantir tumna kal zelah School Education department chuan uniform rawng tur a thlang tawh a, hman ṭan hun tur erawh department hotute'n an la sawi thei lo.

School Education director Dr H Lalthlangliana chuan June 6, 2022 (Thawh­ṭanni) khan School Educa­tion Under Secretary hnenah lehkha thawnin, sorkar sikula zirlaite uniform inang tlang hman tura rawtnate a hriattir a; rawtnate chu pawmsak tur leh a ṭul anga hma laksak turin a ngen a ni.

Director Dr H Lalthlang­liana lehkhaa tarlan danin, Minister leh hotu dangte ṭhukhawm chuan Mizorama sorkar sikul zawng zawngte tan uniform inang tláng neih a rél tawh a; hotute thuchhuak tihhlawhtlin dan tur ngaihtuahin May 20, 2022 khan School Education Director kaihhruaiin ṭhutkhawm leh a ni.

School Education Director hoa ṭhutkhawm­naah hian Mizoram Primary Teachers Association, Middle School Teachers Association, Mizoram Secondary School Teachers Association, Higher Secondary School Lecturers Association of Mizoram, Mizoram Work Experience Teachers Association leh Mizoram Independent School Association aiawhte an tel.

Sorkarin ruahmanna a siam dan chuan, sorkar sikula zirlaite uniform chu primary school, middle school, high school leh higher secondary school-ah kekawr tlâwn leh pawnfên rawng a inang dawn lo a, kawr (kamis) erawh a vár vek tur a ni. School t-shirt, bag leh badge-te chu sikul mal duh thlan ang hman theih a ni ang.

Vanglaini palai zawh­­­na chhangin School Education department hotute chuan, school uniform inang tlang hi hman ṭan hun tur hriat a la ni lo tih an sawi a ni. Hetih lai hian, Mizoram Secondary School Teachers’ Association (MISSTA) Sub-Hqrs, Lunglei chuan May 27, 2022-a conference an neihah common uniform an duh loh thu an tarlang a, 'Common school uniform hmang tura sorkar hmalak mekna hi ṭha kan ti lo tih, a chhan hrang hrang tarlangin sorkarah MISSTA Sub-Headquarters hminga thlen ni se,' an ti.

MISSTA Sub-Hqrs, Lunglei hruaitute chuan Vanglaini palai zawhna chhángin, school uniform inang tlang hman chu sorkarin a kalpui dawn tho nia a lan thu a sawi rualin, "Kan duh lo a ni tih lantir hrim hrim kan duh a ni," an ti.

Mizoram puma MISSTA huang chhung bikah chuan, uniform inang tlang hman chu duh zawk an awm nual tho rualin, a tam zawk erawh chuan an duh lo nia a lan thu an sawi bawk.

SCHOOL COMMON UNIFORM RAWTNA
Sikul Kekawr/pawnfên Kamis
Primary A dumpâwl (dark blue) A var bán bùl
Middle Vutbuak (light grey) A var bán bùl
High school A dum (black) A var bán tlâwn
HSS A dum (black) A var bán tlâwn