Health Minister leh JICA inkâwm

Health minister Dr R Lalthangliana leh Japan International Cooperation Agency (JICA) team chu nimin khan Health Minister pisaah an inkâwm a; Mizoram State Super­specialty Cancer and Research Centre (MSSCRC) din tura hma­lak dan, hmachhawp leh thlen chinte an sawiho.

Health Minister chuan, Mizoram chu India rama cancer hluarna ber a nih thu sawiin, "Cancer vei inenkawlna ṭha tâwk kan la neih loh avangin phai damdawi-inah sum tam tak séngin kal a ṭul ṭhin. MSSCRC hi a puitlin hunah chuan phai pan ngai loin Mizoramah duh tâwka inenkawlna ṭha kan nei tawh dawn a ni," a ti a; sorkar laipuia phalna hmuh ngaite hmuh vek tawh a nih thu a sawi.

Sorkar thuchhuah tarlan danin, inkawmnaah hian MSSCRC chu Japan University ṭhate nen thlun zawmin, thiamna tipung tura thawhhona leh inkungkaihna siam a ni dawn a, a dinna tura sum ruahman chu vbc. 500 a ni.

MSSCRC atana JICA-in survey an neih chu 2022 kum tawp lamah zawh theih beisei a ni a, thawhhona tur thuthlung chu survey zawh a nih hunah ziah a ni ang.