Mizoram Police chuan nimin khan Mizoram hmun hrang hrangah an kum 50-na, golden jubilee an lawm a, Aizawlah chuan chief minister Zoramthanga hoin Vanapa Hall-ah lawm a ni. Chief Minister chuan, sum dinhmun a chhiat êm avangin sorkar hna (post) ruak hnawhkhah theih a nih loh thu a sawi.

CM Zoramthanga chuan, Covid-19 avangin khawvel, India leh Mizoramin harsatna an tawk tih sawiin, "Kan duh emaw, duh lo emaw, min tuam si. Sorkar lian leh ropuite pawhin tihngaihna an hre bik lo. Covid-19 avangin sum leh pa dinhmun a chhia a, tihngaihna a váng a, hrehawm kan ti tlang. Sorkar hnaah hmun ruak hnawhkhah loh a tam a, kan sum dinhmun a chhiat êm avangin a pawimawh zual pawh kan hnawhkhat thei lo. In (police) indaih lohzia kan hria a, a hrehawm khawp mai," a ti.

Thil thleng chu tihdanglam theih a nih loh avangin mahni inthlak a ngaih thu sawiin Zoramthanga chuan, "Hmun ruak kan hnawhkhah theih si loh chuan a tlem ang anga inenkawl dan thiam a ngai. Tunlai khawvelah chuan tun hmaa mi tam tak tih ngai kha tlemtêin khawl hmangin a tih theih tawh. Sorkar hnathawk mi 60,000 chuang an awm a, mihring nuai 10 ṭha âwrh kan awm," a ti a; mihring zat aṭanga chhûtin Mizoramah sorkar hnathawk an tlem loh thu a sawi.

Chief Minister chuan, Covid-19 avanga harsatna thleng chu hlâwkna leh finna atan hman tum a pawimawh thu sawiin, "Covid-19 avanga harsatna thleng hi a hmang thiam apiang an vannei mai dawn a ni. Kan sum dinhmun a chhiat êm avangin kan resource kan mobilise a ngai a, ṭan kan la mek. Harsatna hi hlâwknaah kan hman chuan kan vannei a ni mai. A hmang thiam berah ṭan tum ila, mite entawntlak kan ni thei," a ti.

Home minister Lalchamliana pawhin thu sawiin, Mizoram Police chu India ram mai ni lo, khawvel huapah pawh hna thawk ṭha pawl an nih a rin thu a sawi a, "Police ṭha tia chhàl ngam an niin ka hria. Police hna hi dikna nena hlen chhuah tur a ni a, mipuiin ngaihngam taka min rin theihna atan ṭan lak zel a pawimawh," a ti a; police officer kal khawmte chu rinawm leh dik taka hna thawk tur an ni tih hre thar leh turin a chah.

IGP (Hqrs) John Neihlaia sawi danin, Mizoram Police hnuaiah sanction post aṭanga chhûtin post ruak 32% a awm a, a hniam lamah post ruak tam zualin, constable post ruak un-armed-ah 38% leh armed-ah 44.45% a awm.

Mizoram Police-in an kum 50 tlin hriatrengna atana Police Headquarter-a lung an phun chu Vanapa Hall-a hun hman zawhah Chief Minister-in a hawng.

January 21, 1972-ah Assam sorkar hnuaia Mizo district chu union territory-ah hlàn kai a ni a, Mizo district-a Assam police awm mekte chu Mizoram police-a leh (convert) nghal an ni. Mizoram police zingah ram leh hnam tana nunna chán (martar) 56 leh police chawimawina dawng 417 an awm tawh a ni.

Mizoram Police dinhmun
District executive force 11
Police sub-division 18
Police station 38
*Special police station 3
Police outpost 16
Armed battalion 3
India Reserve battalion 5
Battalion border outpost 23
Police training school 1
#Unit pawimawh dang 5

*Cyber Crime, Special Narcotic leh All Women PS.
#MPRO, Security, Traffic, CID Crime leh Special Branch.